پاڵه‌وانی نێو نامه‌که‌م ، جگه‌رگۆشه‌که‌مه ، جگه‌رگۆشه‌یه‌ک که نه ناوی ده‌زانم ، نه دایکی ده‌ناسم ، نه ده‌شزانم که‌ی و چۆن و له کوێ دێته دنیاوه ، ته‌نها شتێک که ده‌یزانم ئه‌وه‌یه : ده‌غده‌غه‌یه‌کی ده‌روونی لێمده‌خوازێ نامه‌یه‌ک بنووسم ، که‌ی ده‌خوێندرێته‌وه و به ده‌ستی کێ ده‌گات؟ ، گرنگ نییه .
* * *
ده‌مێکه سه‌رقاڵی نووسینی ئه‌و نامه‌یه‌م ، به‌ڵام هێشتا نه‌لواوه بیخه‌مه سه‌ر کاغه‌ز ، هه‌ندێجار گوێ له ترپه‌کانی دڵم ده‌گرم ، ئه‌وان پاڵمپێوه‌ده‌نێن نامه‌که بنووسم ، به‌ڵام هه‌میشه ترسێک ، که پێده‌چێ هی زه‌مانی مردنه ته‌واونه‌کراوه‌که‌م له‌نێو وڵاتدا بێ ، له‌و کاره په‌شیمانم ده‌کاته‌وه .
* * *
نامه‌که‌م ، ده‌یه‌وێ جوابی ئه‌و هه‌موو پرسیاره ترسناکانه بداته‌وه ، که جگه‌رگۆشه هێشتا له دایکنه‌بووه‌که‌م ، ره‌نگه پاش بیست ساڵی دیکه ، یانیش که‌مێک زۆرتر ، له ( بابه) ی بکا .
ئه‌و پرسیارانه‌ی ، زۆرتر له‌وه‌ی جوابویست بن ، گوناهبارکه‌ر و ئازارده‌رن .
پرسیارگه‌لێک ، که له جیاتی ئه‌وه‌ی ( بابه) ناچاری تێڕامان و به‌ره‌ودوێنێ گه‌ڕانه‌وه بکه‌ن ، وایلێده‌که‌ن به ئاره‌قه‌ی شه‌رماویی سه‌ر ته‌وێڵ و کوڵمه‌کانی هه‌راسان بێ و زۆۆر به هێواشی به جگه‌رگۆشه‌که‌ی بڵێ : من نازانم بڵێم چی !! .
* * *
ده‌کرێ ( جگه‌رگۆشه‌که‌م) گله‌ییی بێده‌نگی و بێهه‌ڵوێستیی خۆم و هاوته‌مه‌نه‌کانم ، له زه‌مانی گه‌نجێتیمانمدا لێبکات ، ئه‌و که ته‌واوی بوویه‌ره تاڵ و شیرینه‌کانی زه‌مانی منی ، له رێی کتێبه‌کانه‌وه خوێندوونه‌وه ، سه‌ری سوڕماوه که ئێمه چ نه‌وه‌یه‌کی ده‌سته‌مۆ و گوناه بووین ؟! ، ئه‌و که شتێکی که‌م ده‌رباره‌ی شه‌ڕه‌به‌رده‌کان و هه‌رای کۆڵان به کۆڵانی سه‌رده‌می منداڵیم و ئه‌و هه‌موو کوڕه ئازایانه‌‌ی له‌وێڕۆژێدا ده‌سته‌چیله‌ی به‌ر ئاوری شه‌ڕی ناوخۆ بوون ده‌زانێ ، له پڕ پێمده‌ڵێ : ئێوه چ بێجورئه‌ت بوون .. بابه ! ، منیش به ده‌ستماڵه گوڵداره‌که‌م نێوچه‌وانم ده‌سڕمه‌وه و ده‌ڵێم : من نازانم جورئه‌ت یانی چی ؟! .
* * *
دوای بیست ساڵ ، یان که‌مێک زیاتری دیکه ، زارۆکێک , بڕیاری ئه‌وه ده‌دا ، که نهێنیی ئه‌و پاشڤه‌ڕۆییه فه‌رهه‌نگی و زانستییه‌ی جڤاکه‌که‌ی ویی داپۆشیوه بزانێ ، ده‌یه‌وێ تێبگات که له‌و وڵاته‌ی هه‌میشه باوکه‌که‌ی به (به‌هه‌شتێکی پڕ له میوه‌ی حه‌رام) ده‌یشوبهێنێ ، کام جۆری کیسه‌ڵ باری قورس و پڕ کێشمه‌کێشی ( گۆڕان ) ی له کۆڵناوه ؟ و گه‌نجه‌کانیشی چاوه‌ڕوانی کام فریادڕه‌سیان کردووه تا ئاگریان بۆ بدزێ ؟ .
ئه‌و که پرسیاری زۆر زۆرن ، جگه له (بابه) که‌سێکی دیکه شک نابا ، بۆیه‌ش ده‌چێ ده‌پرسێ : تۆ که گه‌نج بوویت، ده‌تزانی یاخیبوون یانی چی ؟ ، باوکیش گه‌روی وشکده‌بێته‌وه و ده‌ڵێ : من هێشتاش نازانم یاخیبوون یانی چی ؟! .
* * *
کاتێ جگه‌رگۆشه‌که‌م ده‌زانێ سه‌ر به چ نه‌وه‌یه‌کی بێده‌نگ و بێڕه‌نگ بووم ، به نیگاکانی حاڵیمده‌کات که ( جحێڵبوون به بێ یاخیبوون ، یانی ژیان به بێ بوون ) .
تکایلێده‌که‌م نامه‌که‌م بخوێنێته‌وه ، پێیده‌ڵێم : پڕ له دانپیانانی بوێرانه‌یه ! ، لێ ئه‌و پێده‌که‌نێ و ده‌پرسێ: ده‌گونجێ نه‌وه‌ی نایاخی ، دانپیانی بوێرانه‌ی هه‌بووبێ ؟! .
زوو هه‌ست به هه‌ڵه‌که‌م ده‌که‌م و پێیده‌ڵێم : من نازانم ، نه‌وه‌ی نایاخی ، پێویسته چیی
گوتبێ ؟! .
| 
