وێبلاگی یادداشته‌کانی هێمن عه‌بدوڵڵا

Sunday, February 27, 2005
ئێواره یه ک بووینه مۆنالیزا!


به‌رله‌وه‌ی فیلمی ( کیسه‌ڵه‌کانیش ده‌فڕن ) بێته‌ ڤیستیڤاڵه‌ جیهانییه‌کانه‌وه‌ ، ته‌له‌فزوێنێکی کوردی له‌ ( به‌همه‌ن قوبادی ) ی پرسی : بۆچی فیلمه‌کانت هه‌مووی باسی ئازار ده‌که‌ن؟ ، ئه‌ویش به‌ ده‌نگێکی غه‌مگین گوتی : تا کورد له‌ دنیادا ئازار ببینێ ، ناتوانم زوومی کامێراکه‌م بخه‌مه‌ سه‌ر شته‌ شادیهێنه‌ره‌کان !.
ئه‌وه‌نده‌ قسه‌یه‌ی به‌همه‌ن به‌سبوو بۆ ئه‌وه‌ی ئێواره‌یه‌کی کۆتاییی هه‌فته‌ ، کۆمه‌ڵێک کورد، به‌ره‌و سینه‌مایه‌کی هۆڵه‌ندی وه‌ڕێبکه‌وین ، تا فیلمێکی ئێرانی ببینین !!.

* * *

هۆڵی سینه‌ماکه‌ی ئه‌مسته‌ردام جمه‌ی ده‌هات له‌به‌ر خه‌ڵک ، رێزی پێشه‌وه‌ ئێمه‌ بووین و پشته‌وه‌ش که‌سانێکی لێبوون که‌ له‌ تاریکیدا نه‌مانده‌زانی خه‌ڵکی کوێن ؟ ، سه‌ره‌تا تایتلی فیلمه‌که‌ و ناوی ئه‌کته‌ره‌کان ، به‌( سه‌ددام حوسێن ! ) ییشه‌وه‌ ، به‌ زمانی فارسی هاتن!! ... دوایێش به‌ دیمه‌نی کچه‌ کوردێکی منداڵكار که‌ ده‌یه‌وێت له‌ لوتکه‌ی شاخێکه‌وه‌ خۆی هه‌ڵدێرێت ، فیلمه‌که‌ ده‌ستیپێکرد . له‌به‌ر ئه‌وه‌ی هێشتا ده‌ستپێکبوو ، ده‌نگی کۆکین و چرپه‌چرپ نائارامییه‌کی ته‌نکی‌ له‌ هۆڵه‌که‌دا چێکردبوو ، که‌ کچه‌ منداڵکاره‌که‌ خۆی هه‌ڵداشت ، به‌ ئۆۆۆۆۆ یه‌کی درێژ .. بێده‌نگییه‌کی درێژیش باڵی به‌سه‌رداکێشاین ...

* * *
به‌ درێژاییی ئه‌و فیلمه‌ ، هه‌مووان چاومان له‌ په‌رده‌ی سینه‌ما بوو و که‌س ئاگای له‌ ته‌نیشت خۆی نه‌بوو ، له‌ راستیدا فیلمه‌که‌ و چیرۆکه‌ کۆمێدییه‌ دڵته‌زێنه‌که‌ی ! ، بواری بۆ ئاخافتن ده‌گه‌ڵ ته‌نیشته‌خۆتدا نه‌ده‌هێشته‌وه‌ ، سه‌رنجدان له‌ سروشتیبوونی رۆڵی ئه‌کته‌ره‌کان و گریانه‌ ناده‌ستکرده‌کان و پێکه‌نینه‌ زۆر هه‌قیقیه‌کان، مرۆی ده‌گێرایه‌وه‌ بۆ یاده‌وه‌رییه‌کانی سه‌رده‌می زوو ، ده‌مێک بوو گوێم له‌ قسه‌کردنی منداڵه‌ هه‌ولێرییه‌ک به‌ شێوه‌ئاخافتنی سلێمانی و زمان تێکگیرانی با‌دینییه‌کیش که‌ به‌ سۆرانی قسانده‌کات ، نه‌ببوو! ،له‌ مێژبوو مه‌سه‌له‌ی مین و بازرگانیی چه‌ک و هه‌واڵی هه‌میشه‌ دوباره‌بوونه‌وه‌ی شه‌ڕ له‌ ماڵه‌ کوردێکدا راینه‌چڵه‌کاندبووم، بۆیه‌ش هێنده‌ به‌ تامه‌زرۆیی سه‌یری فیلمه‌که‌م ده‌کرد که‌ ته‌نها ئه‌و کاته‌ی دیالۆگه‌کان ده‌بوون به‌ کۆمێدی ، به‌ تریقه‌ی پێکه‌نینی بینه‌رێکی پشته‌وه‌ ، یان به‌ بێده‌نگی و فرمێسکسڕینی یه‌کێکیدی له‌ گرته‌یه‌کی غه‌مگیندا ، ده‌مزانی که‌ له‌ هۆڵی سینه‌مادام و ئه‌وه‌ی ده‌شیبینم فیلمێکه‌ که‌ خه‌ڵاته‌ جیهانییه‌کان به‌ هۆی ئارشیڤکردنی ئازاره‌کانی میلله‌تێکه‌وه‌ کۆده‌کاته‌وه‌‌ !.

* * *




ئه‌ز له‌ رووی هاوسۆزییه‌وه‌ له‌ به‌رهه‌مه‌که‌ی قوبادی ناڕوانم ، ناشمه‌وێت کوردبوونی وی واملێبکات که زێده‌گاڤی بکه‌م له‌ هه‌ڵسه‌نگاندنیدا ، به‌ڵام ئه‌وه‌ هه‌قیقه‌تێکی حاشاهه‌ڵنه‌گره‌ که‌ به‌و به‌رهه‌مه‌ی قوبادی ، دنیا بۆ ناسینمان چاویلکه‌ی روونبینتر ده‌کاته‌ چاوی ، چونکه‌ له‌وێدا باسی میلله‌تێکده‌کات که‌ منداڵه‌کانی به‌ بیستنی هه‌واڵی هه‌ڵایسانی شه‌ڕ ، قوتابخانه‌کانیان ده‌که‌نه‌ سه‌نگه‌ر و نایانه‌وێت ته‌سلیمبن ، کامێراکه‌ی وی به‌ دنیاده‌ڵێت :‌ ده‌شێت میلله‌تێک هه‌بێت که‌ کچه‌ منداڵکاره‌کانی به‌ زۆر هه‌تکبکرێن و زارۆکه‌ دایک و باوک له‌شه‌ڕدا کوژراوه‌کانیشی، له‌ جیاتی قوتابخانه‌ ، له‌ کێڵگه‌کانی مینهه‌ڵگرتنه‌وه‌دا خه‌ریکی ئه‌ڵغام ده‌رهێنانبن ! .

* * *

که‌ ئه‌و فیلمه به‌ ناوه‌رۆک کوردی و به‌ ناو ( ئێرانی !!) ییه‌م بینی ، بیرم له‌وه‌‌کرده‌وه‌ که‌ ده‌بێت چ حیکمه‌تێک له‌ به‌ مۆنالیزابوونی بینه‌رانی ئه‌و فیلمه‌ ، له‌و سینه‌ما هۆڵه‌ندییه‌‌دابێت ؟ ، که‌ هه‌ستاین و گڵۆپی ناو هۆڵه‌که‌ هه‌ڵکران ، دیتم ‌ زۆربه‌ی خه‌ڵکه‌که‌ چاوانیان خه‌مناک بوون و لێویان خه‌ندان !.
---------------------------------------------------------------------------------------------------------* وێنه‌ ته‌نهاکه‌ی به‌همه‌ن به‌ تایبه‌تی بۆ ئه‌م وێبلاگه‌ گیراوه‌ و هیچ شوێنێک به‌ بێپرس مافی بڵاوکردنه‌وه‌ی نییه‌ .
نووسه‌ر Hemn له‌ Sunday, February 27, 2005 0 comments ( بۆچوونی تۆ ) (0)
Monday, February 14, 2005
سه ربڕه کان ناناسم



کاتی خۆی که‌ دیمه‌نی ئیهانه‌ئامێزی زیندانییه‌کانی ئه‌بوغورێبم دیت ، زۆر په‌شیمان بوومه‌وه‌ له‌وه‌ی‌ رۆژێک له‌ رۆژان دڵم به‌ په‌یامبه‌ری درۆزنینه‌ی دێموکراسی خۆشکردبوو و ساده‌دڵانه‌ وامده‌زانی ده‌کرێت ئامریکا ده‌گه‌ڵ خۆیدا بیرکردنه‌وه‌ی( ته‌واو مرۆڤانه‌) بێنێته‌ رۆژهه‌ڵاتی ناڤینه‌وه‌! ، به‌ڵام ئێستا که‌ کۆمه‌ڵێک فیلمی دیکه‌م له‌به‌رده‌ستدان ، تێده‌گه‌م که‌‌ ده‌نێو ئه‌وان هه‌موو شه‌یتانانه‌دا، ناسینه‌وه‌ی فریشته،‌ چه‌نده‌ سه‌خته‌ !! .

* * *
زۆرتر له‌ شه‌ش مانگه‌ خه‌ریکی کۆکردنه‌وه‌ی ئه‌و فیلمانه‌م که‌ گروپه‌ ئیسلامییه‌ توندره‌وه‌کانی ئێراق ، ده‌ینێرنه‌ سه‌ر نێت؛ ئه‌و فیلمانه‌ی هه‌میشه‌ به‌ سرودی ( فجرواهم ، حیث کانوا و انحرواهم ... !! ) یان به‌ تایتلی ( تنفیذ حکم الله ) ده‌ستپێده‌که‌ن و پێشانیده‌ده‌ن که‌ چۆن به‌ سه‌ربڕین و گولله‌بارانکردنی خه‌ڵکی بێده‌سته‌ڵات ، هه‌م ئامریکا له‌ ئێراق ده‌رده‌په‌ڕێندرێت و هه‌میش حوکمه‌تی ئیسلامی بنیاد ده‌نرێت ! . دیمه‌نه‌کان هێنده‌ راچڵه‌کێنه‌رن که‌ به‌ ته‌واوی تێڕوانینی مرۆڤ سه‌باره‌ت به‌ مرۆڤایه‌تی ده‌گۆڕن‌ ، من ئێستا تێگه‌یشتووم که‌ مرۆڤ به‌وراده‌یه‌ش که‌ بیری لێده‌که‌ینه‌وه‌ بێگوناه نییه‌ ، تێشگه‌یشتووم که‌ : ئه‌گه‌ر باوه‌رت وابێت ده‌توانیت ده‌گه‌ڵ ئیسلامییه‌کی ده‌مارگیردا دیالۆگ بکه‌ی ، ئه‌وه‌ خۆشخه‌یاڵێکیت و هیچیتر نا ...

* * *
له‌ یه‌کێک له‌و فیلمانه‌دا سێ گه‌نجی کورد ده‌بینم ، منداڵکارن و له‌ شێوازی ئاخافتن و سه‌یرکردنه‌‌ سڵه‌کانیانه‌وه ،له‌وه‌‌ تێده‌گه‌م که ‌ له‌ودیوی کامێراکه‌وه‌ ، چاوێک ، یان ده‌ست و بازوویه‌کی تۆقێنه‌رهه‌یه‌ که‌ ده‌یانترسێنێت ، به‌ شڵه‌ژاوی ناوی خۆیان ده‌ڵێن و که‌مێکی تر دیمه‌نی سه‌ربڕینی یه‌که‌میان پێشان ده‌درێت ، ئینجا ئه‌ویتریان و دوایێش سێیه‌مینیان .. سه‌ربڕ ده‌ستی ناله‌رزێت و وه‌ک ده‌مێک بێت سه‌ری مرۆڤان ببڕێ ، سه‌ره‌کانیان هه‌ڵده‌گرێ و له‌سه‌ر لاشه‌ی کورده‌کوژراوه‌کانی داده‌نێت .. ئه‌زیش خێرا فرمێسکه‌کانم ده‌سڕم ‌و بیر له‌و دایک و که‌س وکاره‌ ده‌که‌مه‌وه‌ که‌ زارۆیه‌ بێگوناهه‌کانیان به‌ سه‌ربردراوی بۆ ده‌ڕواته‌وه‌ و قه‌تیش ئه‌و فیلمه‌ نابینن .. خۆ چاترکه‌ نه‌یبینن، ئاخر ئاوا ، که‌مێک خه‌میان سوکتره‌ .

* * *
له‌ فیلمێکی تردا ، چوار پۆلیسی ئێراقی پێشانده‌درێن ، خۆیان ده‌ناسێنن ، یه‌کێکیان زۆر له‌ براچکۆله‌یه‌کی من ده‌چێ ، له‌ کاتی خۆناساندندا زمانی تێکده‌ئاڵێت ، یه‌کێکی دیکه‌یان خۆی پێناناسێندرێت ، به‌ شێوه‌یه‌ک سه‌یری کامێرا ده‌که‌ن که‌ وا هه‌ستده‌که‌ی ده‌یانه‌وێت به‌ چاوه‌ نزائامێزه‌کانیان دوایین تکا بۆ رزگاربوون بکه‌ن ، هه‌ستده‌که‌یت ، ئه‌وه‌ی له‌ برا چکۆله‌که‌ی من ده‌چێت وا ده‌زانێت ئێستا براگه‌وره‌که‌ی ده‌یبینێ و وه‌ک سه‌رده‌می شه‌ڕه‌به‌رده‌کانی منداڵی زوو فریای ده‌که‌وێ ، به‌ڵام تازه‌ زۆر دره‌نگه‌ و چه‌ند چرکه‌یه‌کی پێناچێ که‌ خاوه‌نی چاوه‌ نزائامێزه‌کان گولله‌باران ده‌کرێن .. تۆی بینه‌ریش تا هێزت تێدایه‌ ده‌زریکێنیت و تف له‌ ویژدانی خه‌وتووی پیاوه‌ ده‌مامکداره‌ ره‌شپۆشه‌کان ده‌که‌ی.

* * *

فیلمه‌کان زۆرن ، هه‌ر له‌ سه‌ربرینی جاک هێنسڵیی ئامریکایی و کوشتنی وه‌رگێریک که‌ پێشتر داوا له‌ هه‌موو وه‌رگێرانی عاره‌بی زمان ده‌کات هاوکاریی ئه‌مریکا نه‌که‌ن که‌چی دوایێ به‌ گولله‌یه‌ک کۆتایی به‌ ژیانی ده‌هێنرێت و ئه‌و پیاوه‌ی وه‌ک کۆترێک له‌ سه‌ربه‌ردێک دایده‌نێن و ده‌یکه‌ن به‌ نیشانه‌ بۆ تاقیکردنه‌وه‌ی ده‌ستڕاستیی موجاهیده‌کان!! ، تا ده‌گاته‌ دیمه‌نی سوتاندنی ماشێنێکی سوپای ئه‌مریکی له‌ ناو شاری موسڵدا و هۆڕنی شادیی ماشێنه‌کانی دیکه‌ و په‌نجه‌ به‌رزکردنه‌وه‌ی خه‌ڵك وه‌ک نیشانه‌ی سه‌رکه‌وتن .. هه‌موویان به‌ زمانێکی ساده‌ پێتده‌ڵێن : هێشتاش له‌ ئێراقدا، ئه‌قڵ مه‌حه‌لی نییه‌ له‌ ئیعرابدا !.

* * *

‌ خه‌ریکی نووسینی ئه‌و دێڕانه‌م ، چاوم ده‌که‌وێته‌ سه‌ر رۆژنامه‌یه‌کی هۆڵه‌ندی ، تێیدا نووسراوه‌ : نمایشکارێکی جل و به‌رگ ، سمته‌ نازداره‌کانی خۆی به‌ مه‌بله‌غی 50000 یۆرۆ بیمه‌ کردووه‌ ، به‌و پێیه‌ش کۆمپانیایه‌ک بۆ هه‌تاهه‌تایه‌ به‌رپرسیاره‌ له‌ به‌ نازداری مانه‌وه‌ی سمته‌کانی ئه‌و خانمه‌ ناسکه ! .. به‌ خۆمده‌ڵێم : دنیایه‌کی سه‌یره‌ ، لێره‌ خه‌ڵک خه‌می سمته‌کانی ده‌خوات ، که‌چی له‌وێ ئینسانه‌کان گۆشه‌وگۆش سه‌رده‌بردرێن ، به‌ڵام که‌س نازانێت بکوژه‌کانیان کێن ؟!! .
نووسه‌ر Hemn له‌ Monday, February 14, 2005 0 comments ( بۆچوونی تۆ ) (0)
Saturday, February 05, 2005
نامه یه ک له کوردێکی هۆڵه نداوه ..
هاونیشتمانییه‌کم، که‌ قوتابیی کۆلێژی ئه‌ندازیاریی یه‌کێک له‌ زانکۆ به‌ ناوبانگه‌کانی هۆڵه‌نده‌ ،
ئه‌م بابه‌ته‌ی سه‌باره‌ت به‌ گیرانی خانمه‌ نووسه‌ر ( شه‌مزین جیهانی ) نووسیوه‌ ، وێڕای ده‌ستخۆشیم بۆی ، حه‌زم کرد بیخه‌مه‌ به‌ردیده‌ی هۆڵه‌ندیزانانی وێبلاگه‌که‌م
.
.............................................................................................

Ondersteuning voor de Koerdische schrijfster ( Shemzin Jihani) uit koerdistan (Iran) ..

M. Kia


Shemzin een Koerdische schrijfster uit Mahabad – koerdistan(Iran), die zich actief inzet voor de positie van vrouwen en voor haar eigen volk. Ze stelt de invloed van de vrouw op de maatschappij aan de kaak, maar ook de verantwoordelijkheid en gelijkheid van de man en de vrouw.
De vrouw wordt in Iran onderdrukt en niet als gelijkwaardig behandeld. Tevens wordt het Koerdische volk waartoe zij behoord ook niet als gelijkwaardig beschouwd in de Iranese samenleving.

De rol van de vrouw beperkt zich niet alleen tot de opvoeding van de kinderen en tot het bedekken van haar eigen mooie lichaam ter wille van de mannelijke dominantie.
Zoals de vrouw het recht heeft om als individu te worden gerespecteerd zo moeten ook de 40 miljoen Koerden het recht hebben op zelfbeschikking en hun eigen mening kunnen uiten.
Dat is het recht van iedereen. Aldus schrijfster Shamzin Jihani.

De executie van haar vader heeft Shemzin er niet van weerhouden door te gaan met schrijven.
Haar mening en activiteiten zijn niet acceptabel voor het dogmatische Iranese regime.
Mede daarom wordt zij regelmatig bedreigd en onlangs gearresteerd en berecht.

Shemzin is schuldig bevonden aan het volgende:
1- Zeer actief bij de rol van vrouwen in koerdistan.
2- Het schrijven van de artikelen over Koerdische politicus vrouwen met name over Laila Zane en Nuriye Kesbir.
3- Actief betrokken met de Koerdische congressen.
4- Duidelijkheid geven over koerden, hun situatie en hun recht.
5- Enz.

Naast de 3 maanden gevangenis straf heeft Shemzin een grens en straatverbod gekregen.
Dit houdt in dat zij Iran niet mag / kan verlaten en dat wanneer zij buiten de provincie Mahabad wil reizen toestemming aan de politie moet vragen.

Helaas is dit niet de eerste keer dat een schrijver of schrijfster onder druk wordt gezet en waarschijnlijk zal het ook niet de laatste keer zijn. Daarom vraag ik alle humanitaire organisaties en anderen met gevoel voor rechtvaardigheid en m.n. die actief zijn in deze regio, zich met kracht in te zetten voor haar vrijheid en hun beklag te doen bij de Iranese regering.
Maar vooral ook om haar te steunen in haar strijd.
Men moet beseffen dat het hier niet alleen om een kwestie van 3 maanden gevangenisstraf gaat, maar om de vrijheid en de menselijkheid.
Om een schrijfster die zich helemaal geeft voor de basisrechten van de vrouw en die andere 40 miljoen mensen die dit wordt onthouden.

- Meer informatie over Shemzin Jihani via onderstaande links:
http://www.klawrojna.com/asp/userform.asp http://www.kurdmedia.com/news.asp?id=6061 http://www.klawrojna.com/asp/userform2.asp http://www.dengekan.com/doc/2005/1/shamzinJihane.htm http://www.iranfocus.com/modules/news/article.php?storyid=1075 http://www.eastkurdistanpress.com/English/index.htm
نووسه‌ر Hemn له‌ Saturday, February 05, 2005 0 comments ( بۆچوونی تۆ ) (0)
Thursday, February 03, 2005
کفنم دڕی

زۆر جاران داده‌نیشم و بیر له‌وه‌ ده‌که‌مه‌وه‌ که‌ : باشه‌ ئه‌رکی من چییه‌ له‌و دنیایه‌دا ؟ .. راده‌وه‌ستم ، که‌مێک هێواش پێڵوه‌کانم لێکده‌نێم و ده‌یهێنمه‌ پێشچاوی خۆم که‌ ده‌بێ چی بکه‌م ... ئاه ، زۆر شت هه‌ن که‌ ده‌بێت به‌ر له‌ مردنم بیانکه‌م ، زۆر شت .. زۆر شت .

* * *

مانگێک له‌وه‌وپێش ،خه‌ریکی نووسینێک بووم بۆ رۆژنامه‌یه‌کی کوردی ، به‌رامبه‌ر کامپیوتێره‌که‌م دانیشتبووم ، هه‌ستم به‌ خورانی ناوکم کرد ، خوراندم و خوراندم ، تا هه‌ستمکرد ئازاری خۆمم داوه‌ ، که‌ کراسه‌که‌م هه‌ڵدایه‌وه‌ ، دیتم خوێنێکی زۆرم له‌به‌ر رۆیشتووه‌ ! ... خێرا که‌وتمه‌ خاوێنکردنه‌وه‌ی ، جوان به‌ داووده‌رمان شوشتم و پێچامه‌وه‌ ، دوای هه‌فته‌یه‌ک ، خوێنه‌که‌ ڕانه‌وه‌ستا ، هه‌موو شه‌وێ ده‌بووایه‌ جوان پاکی بکه‌مه‌وه‌ و بیپێچمه‌وه‌ ، هه‌ر نه‌وه‌ستا . ناچار چوومه‌ لای دکتۆر ، ئه‌ویش خاوێنیکرده‌وه ‌و پێچایه‌وه‌ و ناردمیه‌وه‌ ماڵێ ، هه‌فته‌یه‌کی دیکه‌ش تێپه‌ڕی و خوێنی ناوکم هه‌ر نه‌وه‌ستا ، چوومه‌ نه‌خۆشخانه‌یه‌کی به‌ ناوبانگی ئه‌مسته‌ردام ، خانمه‌ دکتۆرێکی نه‌شمیل و دڵفریوده‌ر تیماری کردمه‌وه‌ و ده‌رمانێکی بۆ نووسیم ، پێی گووتم : بڕۆ ، تۆ پێویستت بێره‌ نابێته‌وه‌ ، چاک ده‌بی ....

هه‌رچه‌نده‌ زۆرم حه‌زده‌کرد جارێکی دیکه‌ش رێمبکه‌وێته‌وه‌ وێ و جارێ چاکنه‌بم ! ، به‌ڵام تا ئێستا خوێنم لێنه‌هاتۆته‌وه‌ !! .

* * *


نزیکه‌کانم زۆر ناره‌حه‌ت بوون به‌و نه‌خۆشییه‌م ، هه‌ندێکیان به‌ چاوێک سه‌یریانده‌کردم که‌ دڵنیا بووم ئه‌و خوێنرانه‌وه‌ستانه‌م ده‌ردی مردنێیه‌ ... به‌ڵام نه‌مردم و کفنم دڕی ! .

نازانم خۆشحاڵبم یان زویر ؟! .. باشه‌ مانه‌وه‌ له‌ گه‌مه‌یه‌کدا که‌ زۆر بێمانایه‌ ، خۆشحاڵیی گه‌ره‌که‌ ؟! .

* * *

جارێکیان ، له‌ کتێبێکی زۆر قه‌ببه‌دا خوێندمه‌وه‌ که‌ : پێتڤییه‌ مرۆڤ به‌دوای مانایه‌کدا بۆ ژیانی خۆی بگه‌ڕێت ، جا نا‌بێت له‌ بیریشی بچێت که‌ ( ژیان بریتییه‌ له‌و خزمه‌تانه‌ی پێشکه‌شی مرۆڤایه‌تیی ده‌که‌یت و ئه‌و حیکمه‌تانه‌ش که‌ له‌ مرۆڤایه‌تییه‌وه‌ فێریانده‌بیت ) ، که‌واته‌ من زۆر شتم ماوه‌ که‌ بیکه‌م ، بۆیه‌ش جارێ ناچم بمرم !!.

نووسه‌ر Hemn له‌ Thursday, February 03, 2005 0 comments ( بۆچوونی تۆ ) (0)
About Me
ناو: Hemn
شوێنی ژیان
سه‌باره‌ت به‌ من
See my complete profile
Previous Post
Archives
Links