وێبلاگی یادداشته‌کانی هێمن عه‌بدوڵڵا

Monday, July 25, 2005
ئه و بێهه ڵوێستییه تا که ی ؟



ئه‌وه‌ی له‌ دوو هه‌فته‌ی رابردوودا ، له‌ ( مه‌هاباد) ی رۆژهه‌ڵاتی کوردستاندا روویدا ، سه‌ره‌ڕای ئه‌وه‌ی ڕووداوێکی دڵته‌زێن بوو ، به‌ڵام بیانوویه‌کی چاکیشبوو بۆ ته‌قاندنه‌وه‌ی رقی کلپه‌سه‌ندووی خه‌ڵک ، له‌و دوو هه‌فته‌یه‌دا سابڵاغییه‌کان به‌ ده‌نگی به‌رز هاواری ئازادیویستییان هه‌ڵدا و به‌ درێژایی ئه‌و دوو هه‌فته‌یه‌ش هاونیشتمانییه‌ که‌مێک به‌ ئازادیگه‌یشتووه‌کانی باشوریان ، ده‌نگێکی چکۆلانه‌ی پشتیوانییان بۆ هه‌ڵنه‌هێنان ، بۆیه‌ش ئه‌وان به‌ ناچاری پرسییان : ئه‌و بێهه‌ڵوێستییه‌ تا که‌ی ؟

* * *

دوو هه‌فته‌ بوو ( مه‌هاباد ) شینگێڕیی بۆ جحێڵێکی به‌ قێزه‌ونیکوژراوی خۆیده‌کرد ، دوو هه‌فته‌بوو لاشه‌ی شینهه‌ڵگه‌ڕاو و جه‌سته‌ی شه‌قارشه‌قارکراوی ( شوانه‌ ) ، وێردی سه‌رزاری کورده‌ تووڕه‌کان بوو ، دوو هه‌فته‌ بوو دایکه‌کان به‌ جلی ره‌شه‌وه‌ پرسه‌گێڕه‌کانیان هانده‌دا که‌ چیدی ناهه‌قی قبوڵنه‌که‌ن و بڕژێنه‌سه‌رشه‌قام ، تا چیدی ( شوانه‌ ) کان نه‌کوژرێن و لاشه‌یان نه‌شێوێندرێ .
زۆرتر له‌ دوو هه‌فته‌ش بوو که‌ پاسدار و به‌سیجی و ئیتیلاعات و سه‌رباز ، پێکڤه‌ گه‌نجه‌کوردیان راوده‌نان و زینداییانده‌کردن ، به‌ڵام له‌ باشور ده‌نگی ناڕه‌زایی هه‌ڵنه‌ستا و ئه‌وانه‌ی چاودێریی ره‌وشه‌که‌شیان ده‌کرد ، به‌ بێتاقه‌تییه‌وه‌ له‌ باشورییه‌ که‌مێک به‌ ئازادیگه‌یشتووه‌کانیان پرسی : ئه‌و بێهه‌ڵوێستییه‌ تا که‌ی ؟

* * *

کاتێک له‌ ده‌ستوری کاتیی ئێراقدا ، دان به‌ فێده‌ڕالیزمدا نرا ، مه‌هاباد جه‌ژنی گێڕا ، ئه‌و رۆژه‌ی کوردێک بوو به‌ سه‌رکۆماری ئێراقێ ، له‌ مه‌هاباد شایی و لۆغان بوو ، ئه‌و رۆژه‌ش که‌ باشوری کوردستان سه‌رۆکێکی بۆ خۆی ده‌ستنیشانکرد ، سابڵاغی به‌ میهره‌وه‌ فرمێسکی شادییان رشت ، کاتێکیش ئۆرگانیزه‌کاری هه‌موو ئه‌و هه‌ستده‌ربڕینانه‌ ، به‌ ده‌ستی پاسداران شه‌هیدکرا ، مه‌هاباد چاوه‌ڕوانی سوکه‌ ده‌نگێک ، بڕه‌هاوارێک ، نیوه‌قیژه‌یه‌کی گه‌نجان و رۆشنبیران و ژنانی باشوری کرد ، لێ مخابن ده‌نگی وا نه‌بیسترا ، بۆیه‌ش دیسان پرسرایه‌وه‌‌ : ئه‌و بێهه‌ڵوێستییه‌ تا که‌ی ؟

* * *

پاش شه‌هیدبوونی شوانه‌ ، پارته‌ کوردییه‌کانی رۆژهه‌ڵاتیش ، وه‌ک پارته‌کانی مه‌ ، به‌ چاویلکه‌ی حیزبییانه‌ سه‌یری راپه‌ڕینی مه‌هابادیان کرد ، هه‌ندێکیان به‌ ده‌ربڕینی ناڕه‌زایینامه‌یه‌ک به‌ردیان له‌سه‌ر باسه‌که‌ دانا و هه‌ندێکیشیان ، به‌ په‌له‌په‌ل که‌وتنه‌ ناکۆکی و به‌ نیشاندانی به‌ڵگه‌ی ئه‌وه‌ی که‌ شوانه‌ چالاککاری وان بووه‌ ، ده‌یانویست نێوی خۆیان بێننه‌پێش ، به‌ڵام هیچیان ئه‌وه‌ی ده‌بووایه‌ بۆ پشتیوانیی ته‌واو له‌ راپه‌ریوه‌کان بیکه‌ن ، نه‌یانکرد ! .
گه‌لۆ .. پارتی کوردی ، که‌ رێوشوێنی گونجاوی بۆ هاوکاریکردنی راپه‌رینێک پێنه‌بێ ، به‌ کام چاووڕوو ده‌یه‌وێ ببێته نوێنه‌ری خه‌ڵک ؟ ‌

* * *
هیچکات چاوه‌ڕوانیی ئه‌وه‌م له‌ پارته‌کانی باشور نییه‌ که‌ ناڕه‌زایینامه‌ و جوڵانه‌وه‌ی پشتیوانیکاری،بۆ راپه‌رین و ته‌قینه‌وه‌ جه‌ماوه‌رییه‌کانی به‌شه‌کانی دیکه‌ی کوردستان رێکبخه‌ن ، چونکه‌ ئه‌وان به‌ڵێنیانداوه‌ که‌ خۆیان له‌ ( ده‌ستتێوه‌ردان ! ) له‌ کاروباری وڵاتانی هاوسێ !، بپارێزن .
به‌ڵام کاتێک قوتابییه‌کی زانکۆ و نووسه‌رێکی خۆبه‌ خاوه‌نهه‌ڵوێستزان و رۆژنامه‌نووسێکی کوردینووس ، بێده‌نگده‌بن و شتێکی واناڵێن که‌ هاوسۆزییه‌ک بێت بۆ راپه‌ریوه‌کانی رۆژهه‌ڵات ، وه‌بیرم دێته‌وه‌ که‌ لای ئێمه‌: چیتر کوژرانی کوردێکی سنه‌یی ، به‌ مانای تێرۆرکردنی که‌رکوکییه‌ک نییه‌ له‌ ماڵه‌که‌ی خۆیدا و ئه‌گه‌ریش قامیشلۆیییه‌ک زیندانی بکرێ ، ئه‌وه‌ به‌و مانایه‌ نییه‌ که‌ شه‌نگالییه‌ک به‌ ده‌ستی ئیرهابییه‌ک به‌ بارمته‌گیراوه‌!! .
نووسه‌ر Hemn له‌ Monday, July 25, 2005 0 comments ( بۆچوونی تۆ ) (0)
Wednesday, July 20, 2005
ماڵێک.. پڕ له کتێبی ئیرهاب



وه‌ک هه‌ڤوه‌ڵاتییه‌ک ، سه‌ربورده‌ی گوناهکردن و بێبه‌زه‌ییێتیی( شێخ زاناکان)م له‌ کوردستان تێ ڤێ وه‌ دیت .
دامنابوو ، ئه‌و هه‌فته‌یه ،‌ ده‌رباره‌ی منداڵان و خه‌مه‌کانی وان بنووسم ، به‌ڵام باری دڵته‌نگی و وردبوونه‌وه‌ له‌ شێخه‌کان و هه‌وڵدان بۆ تێگه‌یشتن له‌ هۆکاره‌کانی سه‌رهه‌ڵدانی دیارده‌ی وا دڕندانه‌ له‌ جڤاکی کوردیدا ، هێنده‌ سه‌نگینیی له‌سه‌رشانم دروستکرد ،که‌ نه‌متوانی گۆشه‌ی ئه‌و هه‌فته‌یه‌ی بۆ ته‌رخاننه‌که‌م و نه‌پرسم : شێخ زاناکان کێن ؟ ، خه‌ڵکی کوێن ؟ و په‌روه‌رده‌ی کام جڤاک و جێن ؟.

* * *

که‌ زانیم یا شێخ هاوزمانمه‌ ، خه‌م دایگرتم ، که‌ بیستم هه‌ولێرییه‌ ، دڵگران بووم ، که‌ گوتیشیان : ته‌مه‌نی سی و پێنج به‌هاریی له‌ خوێندنگاکانی کوردستاندا گوزه‌راندووه‌ ، خه‌ریکبوو بته‌قم ! .
تا ئێستا ئه‌وه‌ی وایلێده‌کردم که‌مێک دڵم به‌ ساغله‌میی جڤاکی کوردی خۆشبێ ، سه‌رهه‌ڵنه‌دانی تێرۆری زۆر دڕندانه‌ و بڵاونه‌بوونه‌وه‌ی ئایدیای ئاییندارێتیی به‌ربه‌رییانه‌ بوو ، هه‌میشه‌ ده‌مگووت : تێرۆرکردنی رۆژنامه‌نووسێک و کوشتنی ژنێک و هه‌ڕه‌شه‌لێکردن و ترساندنی مامۆستایه‌ک و تێزابڕشتن به‌ قاچوقولی ڕووتی کچۆڵه‌یه‌کدا ، نیشانه‌ سه‌ره‌تاییه‌کانی به‌ ئیرهاب ئاوسبوونی کۆمه‌ڵگان ، بۆیه‌ش چاره‌سه‌رێکی سه‌ره‌تاییی کارسازانه‌م پێ به‌سبوو بۆ چاره‌کردنیان . لێ ئه‌وکاته‌ی بیستم و بینیم که‌ تێرۆریستی کورد زۆر له‌ هاوشانه‌کانی واوه‌تر رۆیشتووه‌ و نێربازی و مێخه‌ڵه‌تێنی و بۆتێست سه‌ربڕینیشی هێناوه‌ته‌ ده‌فته‌ری چه‌له‌نگییه‌کانی ئیرهابییانه‌وه‌ ، ستۆپێکم کرد و په‌شیمانیی خۆم له‌ بیرۆکه‌ی ( ساغله‌مبوونی جڤاکی کوردی ) گه‌ڵاڵه‌کرد .

* * *

به‌ راشکاوییه‌وه‌ ده‌ڵێم : جڤاکی مه ‌ناساغله‌مه ، که‌ وابێژم ، مه‌به‌ستم هه‌ست بریندارکردنی که‌س نییه‌ ،به‌ڵام ئه‌وه‌ هه‌قیقه‌تێکه‌ و له‌په‌نای وشه‌به‌وشه‌ی ده‌ربڕینه‌کانی شێخ زاناکانه‌وه هه‌ستمپێکرد .
له‌ جڤاکێکی ساغله‌مدا ،که‌سێک که‌ تاوانده‌کات ،دوایێ که‌ گیرا و تاوانه‌که‌ی ئاشکرابوو ،شه‌رم له‌ خۆیده‌کا و زۆرجار له ‌پرمه‌ی گریانده‌دات ، به‌ڵام شێخ زاناکانی مه‌ ،نه‌ک هه‌ر نه‌گریان ، به‌ڵکو وه‌ک هه‌ر کارێکی دیکه‌ی رۆژانه‌ ، چالاکیی سه‌ربڕینه‌کان و سێکسکردنه‌ ئیماندارانه‌ و جیهادییه‌کانیان ! ، به‌ خوێنساردییه‌وه‌ بۆ گێڕاینه‌وه‌ .
ئه‌و ئارامییه‌ زۆر و دڵته‌نگییه‌ که‌مه‌ی به‌ روخساری شێخه‌کانه‌وه‌ بوو ، نیشانیداین که‌ مرۆڤێکی کورد ،گه‌یشتۆته‌ کوێ له‌ دڵڕه‌قیدا !! ، بۆیه‌ش هاوارمان لێهه‌ڵستا و به‌ ده‌نگی به‌رز پرسیمان : چۆن ده‌کرێ به‌ر به‌و دڵڕه‌قییه‌ بگرین و ئاخۆ ده‌وایه‌کی شیفابه‌خشیش ده‌ستده‌که‌وێ بۆ ناساغییه‌که‌مان ؟

* * *

‌ ‌ ده‌رمانی ده‌ردی مه‌، داڕشتنی سیاسه‌تێکی فه‌رهه‌نگیی بایه‌خپێدراوه‌ ، ئێمه‌ پێویستمان به‌وه‌یه‌ که‌ له‌ به‌رامبه‌ر تێنوێتیی تاکه‌کانی جڤاک، بۆ چه‌له‌نگی نواندن و خۆنومایانکردن ، سیاسه‌تێکی فه‌رهه‌نگیی جوابگۆمان هه‌بێت .
پێویسته‌ هه‌ڵمه‌تێکی فراوانی ئاگاییبه‌خشین به‌ هاونیشتمانییه‌کانمان ده‌ستپێبکرێ ، پێتڤییه‌ بزاڤێکی وه‌رگێڕانی ئامانجدار هانبدرێ ،که‌ هه‌م که‌لێنی گه‌وره‌ی بێ کتێبیی ده‌رونناسی و ژیانزانی پڕبکاته‌وه‌ و هه‌میش خه‌ڵک حاڵیبکات که‌ دوور له‌ توندوتیژی ، جۆرێکی دیکه‌ی پێکه‌وه‌ هه‌ناسه‌کێشان هه‌یه‌ ، که‌ پێیده‌وترێ : ژیاندۆستی .

* * *

پێشموایه‌ : ئه‌گه‌ر ده‌سه‌ڵاتی کوردی، به‌ نیازپاکییه‌وه‌ بیه‌وێت رێگه‌بگرێ له‌ دووباره‌بوونه‌وه‌ی دیارده‌ی شێخ زاناکان ، ئه‌وه‌ ده‌بێ له‌ په‌له‌کردن له‌ داڕشتنی سیاسه‌ته‌ فه‌رهه‌نگییه‌ ئامانجدار و بایه‌خپێدراوه‌که‌وه‌ ده‌ستپێبکا و به‌ سه‌رتاپای پرۆگرامه‌ توندوتیژی خوڵقینه‌کانی قوتابخانه‌کانیشدا بچێته‌وه‌ ، ئاخر هه‌م یا شێخ و هه‌م مامۆستا( مافی مرۆڤ پارێز!!) ه‌که‌ی هاوکاری و هه‌م ته‌واوی شێخ زاناکانی دیکه‌ش ، په‌روه‌رده‌ی ئه‌و قوتابخانانه‌ بوون، که‌ به‌ قه‌ولی بیرمه‌ندێکی عاره‌بی : له‌به‌ر ئه‌وه‌ی پڕبوون له‌ کتێبی ئیرهابیساز ، قوتابییه‌کانیشی ئیرهابویست ده‌رچوون ! .
نووسه‌ر Hemn له‌ Wednesday, July 20, 2005 0 comments ( بۆچوونی تۆ ) (0)
Tuesday, July 19, 2005
نامه یه ک بۆ بلاگنووسێک
( .... ) ی ئازیز ..

- پرسیوته‌ : له‌ روانگه‌ی خوێنه‌رێکه‌وه‌، بۆم بنووسه‌ که‌ شێوازی نووسینم چۆنه‌ و چه‌ندیش ده‌توانم په‌یامێک بگه‌یه‌نمه‌ خه‌ڵکی ؟

- وه‌ڵامی من ئاوایه‌ :

* وه‌ک خوێنه‌رێک ، ته‌نیا ئه‌وه‌نده‌ی که‌ ده‌تبینم ده‌نووسی ، واملێده‌کات که‌ قه‌درت بگرم و به‌ حورمه‌ته‌وه‌ له‌ نووسینه‌کانت بڕوانم .. زمانی نووسینتم پێ پاراوه‌ ، لێ نایشارمه‌وه‌ که‌ هێشتاش کێماسیی تێداده‌بینم .

* بۆ نووسه‌ر یان بلاگنووس زۆر گرنگه‌ که‌ به‌ زمانی خۆوه‌ڵاتی بنووسێ ، یانی به‌ زمانێک که‌ ئاسوودانه‌ ده‌توانێ ئاخافتنی پێبکات ، پێتڤییه‌ چه‌ندی ده‌کرێ هه‌وڵ بده‌ی وشه‌کانت خۆشئاواز بن و شایسته‌ی ئه‌و شوێن و کاته‌بن که‌ به‌کارتهێناون ، هه‌ق نییه‌ قه‌ت خۆت زۆر به‌ ده‌ربڕینی کلێشه‌ییه‌وه ‌ببه‌ستییه‌وه ، چونکه‌ خوێنه‌ری ئێستا ، که‌ خوێنه‌ری ئینته‌رنێتییه‌ و پشت به‌ خێرایی له‌ حاڵیبووندا ده‌به‌ستێ ، ڕقێکی گه‌وره‌ی له‌ کلێشه‌یی خوێنییه‌ .

* ئه‌وه‌نده‌ی بۆتده‌کرێ درێژدادڕی مه‌که‌ ، ئه‌وه‌ی ده‌توانی له‌ دوو وشه‌دا بیڵێی ، بۆ به‌ ده‌ وشه‌ ده‌ریده‌بڕی ؟! ، هێنده‌ی ده‌توانی رێزی وشه‌ بگره‌ و به‌ خۆرایی به‌کاریان مه‌هێنه‌ ، هه‌ر وشه‌یه‌ک خاوه‌نی سه‌نگ و که‌سایه‌تیی خۆیه‌تی و تۆی نووسه‌ر پێویسته‌ ئه‌و که‌سایه‌تییه‌ی بپارێزی و ناچاری شتێکی نه‌که‌ی که‌ هه‌ق نییه‌ بیکات!! .

* ئه‌وه‌ی پێویسته‌ نووسه‌رێک له‌ بیری نه‌کات ، جیاوازی کردنه‌ له‌ نێوان هه‌قیقه‌ت و واقیعیه‌تدا ، هه‌قیقه‌ت شتێکه‌ پێویسته‌ ببێ ،وه‌لێ واقیعیه‌ت شتێکه‌ که‌ هه‌یه‌ ، تۆ وه‌ک نووسه‌ر به‌رپرسیاری له‌وه‌ی که‌ به‌ قسه‌کردن ده‌رباره‌ی هه‌قیقه‌ت ، پێوه‌ندی و نێزیکییه‌ک ده‌گه‌ڵ واقیعیه‌تدا به‌رقه‌رار بکه‌ی ، تۆ به‌رپرسیاری له‌وه‌ی که‌ نه‌هێڵی ، خه‌ڵک به‌رامبه‌ر واقیعیه‌ت به‌ چۆکدابێن و هه‌قیقه‌تیان له‌بیر بچێته‌وه‌.

* پاراستنی دیدی بێلایه‌نانه‌ ، هۆکارێکی دیکه‌ی گرنگی گه‌یشتنی په‌یامی تۆیه‌ به‌ خه‌ڵک ، مه‌به‌ستم له‌ دیدی بێلایه‌نانه‌ ، بێهه‌ڵویستی نواندن نییه‌ ، به‌ڵکو مه‌به‌ستم ئه‌وه‌یه‌ که‌ ئه‌گه‌ر ده‌رباره‌ی که‌سێکی تێرۆریستی وه‌ک ( ئاغای ئه‌حمه‌دی نه‌ژاد ) یش بیربکه‌یه‌وه‌ و بنووسیت ، ته‌نیا دیوێکی روخساری ئه‌و که‌سایه‌تییه‌ مه‌بینه‌ ، به‌ڵکو له‌ هه‌موو لایه‌نه‌کانه‌وه‌ شه‌ن وکه‌وی بکه‌ و دواجاریش رای تایبه‌تیی خۆتی ده‌رباره‌ بڵێ .. له‌ بیر مه‌که‌ که‌ خوێنه‌ره‌کانت هه‌موو جۆره‌ که‌سێکن و مه‌رج نییه‌ هه‌موویان به‌ ته‌واوی له‌و باسه‌ یان بڕوا فیکرییه‌ تێگه‌یشتبن که‌ تۆ پێیگه‌یشتووی ، بۆیه‌ش پاراستنی دیدی بێلایه‌نانه‌ ، زه‌روره‌ته‌ .

* زمان باسێکی یه‌کجار گرنگه‌ ، به‌ داخه‌وه‌ لای ئێمه‌ به‌ هۆی هێرشی فه‌رهه‌نگیی ناڕه‌وای داگیرکه‌رانی کوردستانه‌وه‌ ، جۆرێک له‌ ده‌مارگیری به‌رامبه‌ر زمان دروست بووه‌ ، ئه‌وانه‌ی کوردن و به‌ عاره‌بی یان فارسی یانیش تورکی قسانده‌که‌ن ،له‌ زۆربه‌ی حاڵه‌ته‌کاندا له‌ جیاتی ئه‌وه‌ی زمانی خۆیان لا شیرین بکرێ ، له‌ کۆڕی روناکبیراندا ده‌بوغزێندرێن ، به‌ڵام من وا بیرناکه‌مه‌وه‌ و پێموایه‌ : سه‌ڕه‌ڕای هه‌موو ناهه‌موارییه‌کیش که‌ به‌ده‌ست ئه‌و هاوسێ نامیهره‌بانانه‌وه‌ کێشاومانه‌ ، به‌ڵام دواجار مه‌حکومین به‌وه‌ی که‌ ده‌گه‌ڵیان بژین و کارتێکه‌ریی فه‌رهه‌نگیی وانمان له‌سه‌ربێ و ئێمه‌ش کاریان تێبکه‌ین . مرۆی کوردی ،به‌ خۆدوورگرتن له‌ فه‌رهه‌نگه‌کانی دیکه‌ و به‌ تێکه‌ڵاونه‌بوون ده‌گه‌ڵ گه‌لانی تر ناتوانێت سه‌رده‌مییانه‌ بژیت و دنیا بناسێت ، قبوڵ بکه‌ که‌ له‌ نووسینیشدا ره‌نگدانه‌وه‌ی پۆزه‌تیڤانه‌ی فه‌رهه‌نگێکی غه‌یره‌ کوردی ، به‌ مه‌رجێک بتوانێت قاوغه‌ کوردییه‌که‌ی بپارێزێ ،نه‌ک هه‌ر گوناه نییه‌ ،به‌ڵکو خزمه‌تیشه‌ به‌ کولتوری نه‌ته‌وه‌یی خۆت .


* نووسه‌ر یان بلاگنووسی چاک ،قه‌ت ناچێ باسی شتێک یان مه‌سه‌له‌یه‌ک بکات که‌ هیچی له‌باره‌وه‌ نازانێت ، به‌شی زۆری نووسه‌رانی ئێمه‌ ده‌که‌ونه‌ ئه‌و هه‌ڵه‌یه‌وه‌ و بۆیه‌ش نووسراوه‌کانیان بۆنی ناکامڵی و وڕێنه‌گۆییی لێدێ ، ئه‌گه‌ر ده‌ته‌وێت خوێنه‌ره‌که‌ت پێتنه‌ڵێت : وڕێنه‌گۆ ، قه‌ت قسه‌ له‌شتێکدا مه‌که‌ که‌ هیچی له‌باره‌وه‌ نازانیت ، یان هه‌ستێک و ناسینێکت بۆی نییه‌ .

* له‌ هه‌مووشی گرنگتر ، قه‌ت بۆ قسه‌کردن ،ئیزن له‌که‌س مه‌خوازه‌، تۆ خۆتی و راکانیشت هی تۆن ، هیچ که‌سێک و لایه‌نێک بۆی نییه‌ ،فێرت بکات که‌ چۆن قسه‌بکه‌ی و چۆن بیربکه‌یه‌وه‌ ، به‌ بڕوای من ،هیچ شتێک له‌ دنیادا له‌ سه‌ربه‌خۆییی تاکه‌که‌سی گرنگتر نییه ‌بۆ مرۆڤ ، ئه‌گه‌ر ده‌ته‌وێت ئه‌و سه‌ربه‌خۆییه‌ت پارێزراو بێت ، جورئه‌تی ئه‌وه‌ بکه‌ ، که‌ له‌پێناویدا بجه‌نگێی و باجه‌که‌شی قبوڵ بکه‌ی .


..............................
‌ وه‌ک خوێنه‌رێک ، قسه‌ی دیکه‌شم زۆرن که‌ بۆ تۆی بلاگنووس بیکه‌م ،به‌ڵام با ئه‌و جاره‌ هه‌ر هێنده‌ به‌س بێ و نووسراوه‌کانی ئاینده‌ت ببینین! .

ده‌شمه‌وێ ئیزنی ئه‌وه‌ت لێبخوازم،که‌ ئه‌گه‌ر پێتباشبێ ، ئه‌و نامه‌یه‌ له‌ وێبلاگه‌کانماندا بڵاوبکه‌ینه‌وه‌ ، تا بلاگنووسانی دیکه‌ش بیبینن و له‌هه‌ڵه‌کانمان ئاگادارمان بکه‌نه‌وه‌ .

به‌ هیوای سه‌رکه‌وتن و به‌رده‌وامی .....


هاوزمانت
هێمن عه‌بدوڵڵا

...........................................................


تێبینی : ئه‌م نامه‌یه‌ ، وه‌ڵامی ئیمایلی بلاگنووسێکی ئازیزه‌ ، که‌ له‌سه‌ر داوای ئه‌و ، ناویم نه‌نووسیوه‌ و نامه‌که‌ش ته‌نیا لێره‌دا بڵاوکراوه‌ته‌وه‌ . .
نووسه‌ر Hemn له‌ Tuesday, July 19, 2005 0 comments ( بۆچوونی تۆ ) (0)
Monday, July 18, 2005
قسه ی رۆژ ( 7 )



له‌وبه‌ری زه‌ریاکانه‌وه‌ ، هاواری لاوه‌ دلێره‌کانی مهاباد ده‌بیستم ، خوابکات ئه‌وه‌ ده‌ستپێکی شۆڕشێک بێت ... خوابکات ئه‌و رابوونه‌ش وه‌ک زۆر رابوونی دیکه‌مان سه‌رکوت نه‌کرێت ... خوابکات رۆحی شوانه‌ی به‌ غه‌در کوژراو ، له‌ سایه‌ی ئازادییه‌کی نێزیکدا شاد بێت ...

هێمن
نووسه‌ر Hemn له‌ Monday, July 18, 2005 0 comments ( بۆچوونی تۆ ) (0)
Thursday, July 14, 2005
قسه ی رۆژ ( 6 )
ئه‌و مۆمه‌ خه‌ریکه‌ ده‌کوژێته‌وه‌ ، به‌ڵام ئه‌م ده‌نگه‌ کپ نابێ . ئه‌و ده‌نگه‌ ، ده‌نگی ژیانی ئاشتیخوازانه‌ ، ته‌حه‌ممولکردنی یه‌کتری ، ڤیان بۆ مرۆڤایه‌تی ، خۆبه‌خشی بۆ خه‌ڵک ، راستیویستی ، ئازادیویستی ، دێموکراسیویستی ، رێزگرتنی دژه‌کان ، قبوڵکردنی شێوازه‌ جیاوازه‌کانی ژیان ، جوێکردنه‌وه‌ی ده‌وڵه‌ت له‌ جڤاکی شارستانی ، ............ ، جوێکردنه‌وه‌ی دین له‌ده‌وڵه‌ت ، ............. ، فێده‌ڕالیسم له‌ چوارچێوه‌ی ئێرانی دێموکرات ، ره‌تکردنه‌وه‌ی توندوتیژییه‌......
ئه‌و مۆمه‌ خه‌ریکه‌ ده‌کوژێته‌وه‌ ، به‌ڵام ئه‌م ده‌نگه‌، ده‌نگی به‌رزتری به‌دوادادێ .


به‌شێک له‌ نامه‌ی رۆژنامه‌ڤانی زیندانی : ( ئه‌کبه‌ر گه‌نجی ) ، کۆنه‌پارێزه‌ری سیستمی ده‌وڵه‌تی ئیسلامی له‌ ئێران و ره‌مزی هه‌نووکه‌ییی سه‌رکوتکردنی ده‌نگی ئازاد له‌و وڵاته‌دا .
ماڵپه‌ری گوویا ، 14 / 7 / 2005
نووسه‌ر Hemn له‌ Thursday, July 14, 2005 0 comments ( بۆچوونی تۆ ) (0)
Tuesday, July 12, 2005
سه فه رکردنتان هه ڵه یه



چه‌ند هه‌فته‌ پێش ، ( میدیا ) نووسیی : هێشتاش له‌ رانیه‌ ، سه‌فه‌ری نایاسایی به‌رده‌وامه‌ ... ته‌له‌فۆنم بۆ ماڵێ‌ ‌کرد و ئه‌وانیش پشتڕاستیان کرد که‌ : جحێڵه‌کانی رانیه‌ و ده‌وروبه‌ری ، ئێستاش ده‌یانه‌وێ بێنه‌ ده‌رێ ! ، به‌ حه‌په‌ساوییه‌وه‌ ‌پرسیم : دێنه‌ کوێ ، تۆ بڵێی هه‌واڵی ناخۆشیی ئێره‌یان نه‌بیستبێ؟! ،لێ به‌ غه‌مگینییه‌وه‌ لێیانپرسیم‌ : به‌ راست ئه‌وێ ناخۆشه‌ ؟ ، بێ بیر لێکردنه‌وه‌ گوتم : ئه‌رێ .. ئێره‌ ته‌نیا بۆ پیاسه‌یه‌کی رێبوارانه‌ خۆشه‌ ..

* * *
خه‌سڵه‌تێکی جوانی بنیاده‌م ، خواستی سه‌فه‌ر و دنیادیتنیه‌تی ، ئه‌وانه‌ی حه‌زیان له‌سه‌فه‌ر نییه‌ ، له‌ راستیدا حه‌زیان له‌ ناسینی دنیا نییه‌ ، ئه‌وه‌ی نا‌یه‌وێت ئۆقیانووسه‌کان ببڕێ و پێیخۆشنییه‌ کێوه‌ بڵندباڵاکان له‌ لوتکه‌وه‌ ببینێ ، ناشیه‌وێت له‌ حیکمه‌تی بوون و مانه‌وه‌ی مرۆڤ بکۆڵیته‌وه‌ و مه‌به‌ستی نییه‌ مانا بۆ زینده‌گیی خۆی بدۆزێته‌وه‌.
بۆیه‌ش که‌ مرۆڤێک بڕیاری سه‌فه‌رده‌دات ، چه‌نده‌ بۆی گرنگه‌ له‌ یاده‌وه‌ری و بوویه‌ره‌ ناخۆشه‌کانی وڵاتی خۆی دوورکه‌وێته‌وه‌ ، هێنده‌ش حه‌زده‌کات ، سه‌ر به‌ کڵاورۆژنه‌ی نوێدا بکات و لێیه‌وه‌ ره‌نگی تازه‌ و شوێنی جودا ببینێ ..... به‌ڵام ئایا ته‌نیا حه‌زکردن به‌سسه‌ ؟

* * *

له‌ ماوه‌ی ئه‌و چه‌ندساڵه‌دا، بۆمده‌رکه‌وتووه‌ که‌ زۆربه‌مان ، ئه‌وانه‌ی دوای کۆتایی نه‌وه‌ده‌کان باشوری کوردستانمان به‌ جێهێشت‌ ، ته‌نیا حه‌زمانکرد‌ به‌ جێیبێڵن و نه‌مانویست‌ بیر له‌ قۆناغی دوای به‌جێهێشتن بکه‌ینه‌وه‌ ، بۆیه‌ش هه‌رزوو ، لێره‌ تووشی نائومێدی و شکه‌سته‌ییی رۆحی هاتین ، ئێمه‌ که‌ له‌سه‌فه‌ردا غه‌رقی خه‌یاڵپڵاوه‌کانمان بووین ، رۆژئاوامان وه‌ک وێنه‌یه‌کی به‌ مۆدێرنی موتوربه‌کراوی وڵاته‌که‌مان ‌هێنایه‌ پێش چاو ، کاتێکیش که‌ دیتمان‌‌ ، ئێره‌ ئه‌و به‌هه‌شته‌ جادووییه‌ نییه‌ که‌ بۆیهاتووین ، زوو ده‌ستمان دایه‌ ته‌له‌فۆن و به‌ دۆسته‌ به‌ جێماوه‌کانی گه‌ڕه‌کمان گوت‌‌ : کوڕه‌ نه‌که‌ن بێن .. به‌هه‌شته‌که‌ی ئێره‌ ، کۆڵکه‌زێڕینه‌یه‌که‌ ،‌ هه‌ر له‌ دووره‌وه‌ جوانه‌ !! ، به‌ڵام دۆستانی به‌جێماو ، داڵغه‌یه‌کی بێتاقه‌تانه‌یان لێدا‌‌ و به‌ ته‌وسه‌وه‌ پێیان گوتین‌ : ئه‌گه‌ر ڕاستده‌که‌ن ، بۆ نایه‌نه‌وه‌ ؟ ، ئێمه‌ش ، سه‌ختیی جوابدانه‌وه‌ ناچاریکردین، به‌ په‌له‌په‌ل بڵێین : وابزانم کارته‌که‌م ته‌واو بوو ، جارێ خوات له‌گه‌ڵ !! .

* * *

به‌شێکی ئه‌و ئاشنایانه‌م که‌ ئێستا له‌ ئینگلته‌را ده‌ژین ،خه‌ڵکی پشده‌ر و بیتوێنن ، که‌ به‌ ته‌له‌فۆن قسه‌یان ده‌گه‌ڵ ده‌که‌م ،که‌متر رێکده‌که‌وێ باسی پرۆژه‌ ئاینده‌ییه‌کانیانم بۆ بکه‌ن ، ئه‌وان هه‌میشه‌ به‌ گێڕانه‌وه‌ی بیره‌وه‌رییه‌کی سه‌رده‌می به‌رله‌ تاراوگه‌نشینی ده‌ستپێده‌که‌ن و که‌ لێشیان ده‌پرسم : ئێستا خه‌ریکی چین ؟ ، به‌ پێکه‌نینه‌وه‌ ده‌ڵێن : وه‌ڵڵا ئیشێ ده‌که‌ین و حه‌یب نه‌بێ ، عه‌لوجێکیشمان هه‌یه‌ !! ، ده‌پرسم : عه‌لوج چییه‌ ؟ ، ده‌ڵێن : ئه‌و کچانه‌ی له‌ ئه‌وروپای رۆهه‌ڵاته‌وه‌ هاتوون ، به‌ ئاسانی ده‌بنه‌ دۆستی کوڕان ، بۆیه‌ش نێومان لێناون ( عه‌لوج ! ) ... تێده‌گه‌م که‌ کاکی ئه‌وروپا نشین ، هێشتاش واده‌زانێ ، دۆستی کچ هه‌بوون، ئازایه‌تی وکاسبی و خوێندنه‌! ، به‌ڵام ده‌پرسمه‌وه‌ : ئه‌ی ناچنه‌ مه‌کته‌بێ ؟ ، ده‌ڵێن : ناوه‌ڵڵا ، تاقه‌تمان نییه‌ !!.
که‌مێک داده‌مێنم و دیسان به‌خۆم ده‌ڵێمه‌وه‌ : ئێمه‌ حه‌زمان کرد نیشتمان به‌ جێبێڵێن ، به‌ڵام نه‌مانویست بیر له‌ قۆناغی دوای به‌ جێهێشتنی بکه‌ینه‌وه‌ .

* * *

پێموایه‌ : ئه‌گه‌ر گه‌نجانی رانیه‌ بیانه‌وێ سه‌فه‌ر بکه‌ن ، هه‌قیانه‌ ، هه‌موو که‌س هه‌قیه‌تی سه‌فه‌ر بکات ، به‌ڵام ئه‌گه‌ر پێیان وابێ سه‌فه‌ری ئه‌وساڵیان سه‌فه‌رێکی سه‌رکه‌وتووه‌ ، ئه‌وه‌ مخابن زۆر هه‌ڵه‌ن .. چونکه‌ سه‌فه‌ر ئه‌وکاته‌ سه‌رکه‌وتوویه‌ ،که‌ ئومێدێک بۆ ئه‌نجامدارێتیی هه‌بێت .
له‌وڕۆشدا که‌ ئه‌گه‌ر حکومه‌تگه‌لی ئه‌وروپی له‌سه‌ر هه‌موو شتێک پێک ناکۆک بن، به‌ بیانووی خۆدوورخستنه‌وه‌ له‌ گه‌را دانراوه‌کانی تێرۆر ، له‌سه‌ر مامه‌ڵه‌ی ناشارستانی و جاڕسکردنی په‌نابه‌ران هاوده‌نگن، ‌ سه‌فه‌ری به‌ دره‌نگه‌وه‌ی ئێوه‌ ، هه‌ڵه‌یه‌کی گه‌وره‌یه ئازیزانم‌! .
نووسه‌ر Hemn له‌ Tuesday, July 12, 2005 0 comments ( بۆچوونی تۆ ) (0)
قسه ی رۆژ (5)
(بۆیه‌ سه‌ری خه‌ڵکم پێده‌بڕین ، تا به‌ جورئه‌ت بن و ده‌ستیان ڕابێت !)

دانپێدانانی (شێخ زانا) ، به‌رپرسی ده‌سته‌ تێرۆریستییه‌که‌ی هه‌ولێر .

کوردستان تێ ڤێ 12/7/2005
نووسه‌ر Hemn له‌ Tuesday, July 12, 2005 0 comments ( بۆچوونی تۆ ) (0)
Monday, July 11, 2005
قسه ی رۆژ ( 4 )
( سه‌ركه‌وتنی ئه‌حمه‌دی نه‌ژاد، له‌ سه‌ر ئاستی نێوده‌وڵه‌تی، له‌ به‌رژه‌وه‌ندی مه‌سه‌له‌ی كورددایه .)

کاك مسته‌فای هیجری ، خۆشبینه‌ له‌وه‌ی : سیاسه‌ته‌ هه‌ڵه‌کانی‌ سه‌رکۆماری نوێی ئێران ، له‌به‌رژه‌وه‌ندیی هاونیشتمانییانی رۆژهه‌ڵاتدا ده‌بێت .
ئاژانسی په‌یامنێر 11 / 7 / 2005
نووسه‌ر Hemn له‌ Monday, July 11, 2005 0 comments ( بۆچوونی تۆ ) (0)
Saturday, July 09, 2005
قسه ی رۆژ (3)
( ئه‌و ته‌قینه‌وانه‌ ، به‌ هۆی هه‌ڵه‌کانمانه‌وه‌یه‌ له‌ ئه‌فغانستان و ئێراق ، ئه‌گه‌ریش به‌رده‌وام بین له‌سه‌ر ئه‌و هه‌ڵانه‌ ، هێرشی دیکه‌ و ته‌قینه‌وه‌ی دیکه‌ش رووده‌ده‌ن ! ) .

جۆرج گالاوێی ، په‌رله‌مانتاری ئینگلاندی ، که‌ کاتی خۆی تۆمه‌تی به‌رتیل وه‌رگرتن له‌ ده‌وڵه‌تی سه‌ددامی درابووه‌ پاڵ ، ئاوا ده‌رباره‌ی ته‌قینه‌وه‌کانی له‌نده‌ن ڕای خۆی ده‌ر‌بڕی .
ئاژانسی بی بی سی 8/7/2005
نووسه‌ر Hemn له‌ Saturday, July 09, 2005 0 comments ( بۆچوونی تۆ ) (0)
Tuesday, July 05, 2005
قسه ی رۆژ (2)
( تاکه‌ شتێک که‌ ئینگلیزه‌کان ، بۆ کشتوکاڵی ئه‌وروپی وه‌ده‌ستیان هێناوه‌ ، هاریی مانگایه‌ ! – ناکرێ باوه‌ڕ به‌و خه‌ڵکانه‌ بکرێ که‌ هێنده‌ خراپ چێشت لێده‌نێن ! – دوای فنله‌ند خراپترین خواردنیان هه‌یه‌ ! ) .
* جاک شیراک ، به‌ده‌م قاقالێدانه‌وه‌ له‌گه‌ڵ سه‌رۆکی روسیا و راوێژکاری ئاڵمان باسی ئینگلته‌را ده‌کات .شه‌رقولئه‌وسه‌ت 5/6/2005
نووسه‌ر Hemn له‌ Tuesday, July 05, 2005 0 comments ( بۆچوونی تۆ ) (0)
قسه ی رۆژ (1)
(كه‌س نه‌یگوتووه‌ كێشه‌ی كه‌ركوك ده‌بێت ئێستا چاره‌سه‌ر بكرێ و ته‌نانه‌ت یاسای كاتیی ئیداره‌ی ده‌وڵه‌تیش ئاماژه‌ی به‌وه‌ نه‌كردووه‌) .
*مام جه‌لال ، له‌ کۆنفرانسێکی رۆژنامه‌ڤانیدا ده‌گه‌ڵ برایم جه‌عفه‌ری
په‌یامنێر5/6/2005
نووسه‌ر Hemn له‌ Tuesday, July 05, 2005 0 comments ( بۆچوونی تۆ ) (0)
نامه یه ک و بیره وه رییه ک


ئه‌و نامه‌یه‌ ، ساڵی 2000 بۆ کچێکی هاوسێم نووسرا ، به‌ڵام کچه‌ قه‌ت نه‌یدیت ! ، ئه‌و که‌ خوێنشیرینێکی چاومه‌ست بوو ، نووسه‌ری ئه‌و نامه‌یه‌ی حاڵی کردبوو ،که‌ ئه‌ویش سه‌رگه‌ردانه‌ ، به‌ڵام فه‌رهادی چیرۆکه‌که‌مان ، نه‌یوێرا بچێته‌ پێشێ !! .
خوێنه‌ری ده‌لال .. ئه‌و نامه‌یه‌ هیچ بایه‌خێکی ئه‌ده‌بیی نییه‌ و زۆریش کاڵوکرچه‌ ، به‌ڵام وه‌ک به‌شێک له‌ یادگاریه‌کانی ئه‌وێڕۆژێ، لێره‌دا دایده‌نێم .
.......................................

... بڕیارمدابوو یه‌که‌م نامه‌م بکه‌مه‌ په‌ڕه‌یه‌کی ناسکی هه‌ڵاڵه‌ و له‌ به‌رۆکی وه‌فاداریی بده‌م ، وه‌لێ پێده‌چێت قه‌ده‌ر زووتر فریای خۆی که‌وتبێ و هه‌سته‌ ناسکه‌کانی به‌ هه‌ڵه‌ ره‌وانه‌ی مه‌وته‌نێکی ناشیرینتر کردبێ . تۆ کێیت که‌ ده‌نگت ژێکانی رۆحم ده‌له‌رێنێته‌وه‌ و خه‌نده‌یه‌کی هارمۆنیک له‌ نێوان ویستن ونه‌ویستندا ده‌خاته‌ سه‌رلێوم ؟ ، تۆ گه‌ردی هه‌ڵستاوی سه‌ر کام په‌ڕه‌ی گوڵیت که‌ ده‌پرژێیته‌ سه‌ر روخسارم و ناکامییه‌کانم به‌ داپۆشینی چاوه‌گریاناوییه‌کان ونده‌که‌یت ؟ .. تۆ کێیت ، که‌ ناتناسم ، به‌ڵام خۆشمده‌وێیت ؟....
نووسه‌ر Hemn له‌ Tuesday, July 05, 2005 0 comments ( بۆچوونی تۆ ) (0)
Monday, July 04, 2005
قه رزی که لله سه ر !


دایکم که‌ لێم تووڕه‌ده‌بوو ، پێیده‌گوتم : سه‌ر گه‌وره‌ ! . ئه‌و‌ جوێنه‌،‌ هه‌م تووڕه‌ییی وی داده‌مرکانده‌وه‌ و هه‌م منیشی دڵشکاو نه‌ده‌کرد ، چونکه‌ له‌مێژبوو ده‌مزانی : ( سه‌ری گه‌وره‌ ده‌وڵه‌ته‌ ) ! .
بۆیه‌ش که‌ ده‌گه‌ڵ خوشک و برایان که‌تنێکمان ده‌کرد و شاڵاوی ده‌سته‌ کوته‌ککاره‌کانمان بۆ ده‌هاتن ، پێش هه‌موو شوێنێک ده‌ستمان به‌ که‌لله‌سه‌رمانه‌وه‌ ده‌گرت و ( ده‌وڵه‌ت ! ) ه‌کانمان له‌ زلله‌ی بێڕه‌حمانه‌ی گه‌وران ده‌پاراست .

* * *

زۆر چکۆله‌بووم که‌ حه‌زمده‌کرد بچمه‌ ( خاریج ! ) ، چونکه‌ له‌ فیلمه‌ کارتۆنییه‌کاندا، ده‌مدیت که‌ منداڵه‌ خاریجییه‌کان،قه‌ت زلله‌ی باوانیان وه‌که‌لله‌سه‌ر ناکه‌وێ و به‌ یه‌ک دوو مسته‌کۆڵه‌ی سه‌ر سمت وازیان لێده‌هێنرێ .
زۆریش گه‌وره‌ بووم که‌ حه‌زمده‌کرد بچمه‌ ( خاریج ! ) ، چونکه‌ له‌ کتێبی ( مێژووی فه‌لسه‌فه‌ ) ی
( ویل دورانت ) دا خوێندبوومه‌وه‌ ، که‌ ئه‌وکاته‌ی فه‌رمانڕه‌وای فه‌ره‌نسا ، بڕیارده‌دات ڤۆڵتێری بلیمه‌ت ، به‌ هۆی هه‌ڵوێسته‌ ئازاکانییه‌وه‌ ته‌مبێ بکات ! ، ده‌بێژێت : بیبه‌ن کوته‌ککاریی بکه‌ن ، لێ ئاگاداربن ئازار به‌ که‌لله‌ سه‌ری نه‌گه‌یه‌نن ، چونکێ له‌وێدا ئاقڵێکی مه‌زن هه‌یه‌ .

* * *

بلاگنووسێکی کورد ، له‌ نووسینێکیدا, داوای قه‌رزی که‌لله‌سه‌ری سێ که‌سایه‌تیی سیاسی و فه‌رهه‌نگیی کردووه‌ ، تا له‌دیواریان بدات ! .
که‌سایه‌تییه‌ فه‌رهه‌نگییه‌که‌ ، نۆسته‌رادامووسانه‌ , پێشبینیی سه‌دله‌سه‌دی ده‌رچوونی ( مه‌لا ره‌فسه‌نجانی ) ی کردبوو ، بۆ پۆستی سه‌رکۆماریی ئێران ، بلاگنووسه‌که‌شمان ، داوایلێکردووه‌ که‌ به‌هۆی پێشبینییه‌ سه‌دله‌سه‌د هه‌ڵه‌که‌یه‌وه‌ ، سه‌ری به‌ قه‌رز بداتێ تا له‌ دیواری بدات ! .
‌ دوو که‌سایه‌تییه‌ سیاسییه‌که‌ش ، هێنده‌یان داخوویانی و هه‌ڵوێستی نادروست هه‌بوون ، که‌ به‌ حورمه‌ته‌وه‌ ته‌نێ لێیی پرسیون : ئه‌رێ سه‌رتانم به‌ قه‌رز ده‌ده‌نێ ، تا له‌ دیواری بده‌م ؟! .
‌ نووسینه‌که‌ی ( کانی ) ی بلاگنووس وه‌خه‌نده‌ی خستم ، بۆیه‌ش گوتم : هه‌رچه‌نده‌ شێوازی داواکردنه‌که‌ی کۆمیدیانه‌یه‌ ، به‌ڵام له‌ ناوه‌ڕۆکیدا، پێشنیارێکی ئاقڵانه‌یه!‌ .

* * *
چوارساڵ پێش ئێستا ، به‌ تاوانی نووسینی چیرۆکێک و پشکداریکردن له‌ ده‌رچواندانی کۆڤارێکی روناکبیری ، سه‌ریان له‌ دیواردام . له‌وێڕۆژێدا ، برایه‌کی موسوڵمان پێیگوتم : ئینشاڵڵا ، تابوتت لۆ سازده‌که‌ین و سیاسییه‌کیش فه‌رمووی : بێئه‌خلاقی قبوڵ مه‌که‌ن و سه‌ری له‌ دیواربده‌ن ! ، ئه‌زیش که‌ خورتێکی هه‌ژده‌ساڵانه‌ بووم ، به‌ خۆممگوت : تا له‌سه‌ر بێئه‌خلاقییه‌کی دیکه‌ ، سه‌رت له‌ دیوارنه‌دراوه‌ته‌وه‌ ، بڕۆ بۆ وڵاتی گاوران ، له‌وێ ئه‌گه‌ر له‌ چیرۆکه‌کانیشت تێنه‌گه‌ن ، که‌س پێتناڵێ : هه‌ی کافری ناموسوڵمان ! .

* * *
له‌به‌ر ئه‌وه‌ی خۆم سه‌رم له‌ دیواردراوه‌ ، حه‌زناکه‌م که‌س سه‌ری له‌ دیواربدرێ ، به‌ڵام ئه‌گه‌ر رۆژێک بێ و پێشنیاره‌که‌ی ( کانی ) وه‌دیبێ ،ئه‌وه‌ هه‌موو رۆژێ ، سه‌ری سیاسی و ده‌سه‌ڵاتداره‌کانمان ، ده‌بێ له‌ دیوار بدرێ ‌ ! .
سیاسییه‌کانی مه‌ هێنده‌ هه‌ڵه‌یان زۆرن، که‌ ئه‌گه‌ر له‌ ماوه‌ی بیست و چوار کاژێردا ، که‌ ده‌کاته‌ هه‌زار و چوارسه‌د و چل ده‌قیقه‌ ، سه‌ریان به‌ قه‌رزبده‌نه‌ هه‌زار و چوارسه‌د و چل هه‌ڤوه‌ڵاتیی داواکار ، ئه‌وه‌ هێشتاش خه‌ڵکێکی زۆر له‌ چاوه‌ڕوانیدا ده‌مێننه‌وه‌ و له‌ نیعمه‌تی سه‌رله‌دیواردانی وان بێبه‌شده‌بن ! .


نووسه‌ر Hemn له‌ Monday, July 04, 2005 0 comments ( بۆچوونی تۆ ) (0)
About Me
ناو: Hemn
شوێنی ژیان
سه‌باره‌ت به‌ من
See my complete profile
Previous Post
Archives
Links