وێبلاگی یادداشته‌کانی هێمن عه‌بدوڵڵا

Wednesday, January 26, 2005
ئه و هه له شمان له کیس چوو .



ئه‌م رۆژانه‌ باشوری کوردستان به‌ هه‌ستیارترین قۆناغی دیرۆکیدا تێده‌په‌ڕێت ، چه‌ند رۆژێکی دیکه‌ خه‌ڵک ده‌چێته‌ به‌ر سندووقه‌کانی ده‌نگدان و به‌ پڕکردنه‌وه‌ی لیستێک ، کۆتایی به‌ زۆرتر له‌ چوارده‌ساڵ ئه‌زمونی نیمچه‌سه‌ربه‌خۆی خۆبه‌رێوه‌بردنی پارچه‌یه‌کی نیشتمانه‌که‌مان دێت .
چه‌ند رۆژێکی تر حکومه‌تی هه‌رێمی کوردستان به‌ فه‌رمی ده‌چێته‌وه‌ سه‌ر به‌غدا و به‌مه‌ش جارێکیدی هه‌لی چێکردنی ده‌وڵه‌تی کوردستانمان له‌ کیس ده‌چێته‌وه‌‌ .. بۆیه‌ش ده‌مه‌وێت له‌ دوایین نوسینمدا که‌ له‌ قۆناغی نه‌سه‌ربه‌خۆیی و نه‌ بنده‌ستیدا ده‌ینووسم ، هه‌ڵوه‌سته‌یه‌ک ده‌هه‌ڤبه‌ر ته‌جره‌به‌ نمونه‌ییه‌که‌ماندا بکه‌م .

* * *

به‌ درێژایی زۆرتر له‌ چوارده‌ساڵ، ده‌سه‌ڵاتدارانی کوردستان نه‌ک به‌ گوێی ئێمه‌دا ، به‌ڵکو به‌ گوێی هه‌موو جیهانییانیان دادا ، که‌ له‌ به‌شه‌ رزگارکراوه‌که‌ی باشوری کوردستاندا ، ئه‌زمونێکی دێمۆکراتیکی نموونه‌یی، که‌ له‌ رۆژهه‌ڵاتی ناڤیندا بێوێنه‌یه‌!! ، له‌ حاڵه‌تی خۆ داڕشتندایه‌ .
به‌ڵام هیچکات له‌ خۆیان نه‌پرسی که‌ ئایا که‌موێنه‌ییی ئه‌و ئه‌زمونه‌ له‌ چیدایه‌ ؟ ، له‌ شه‌ری براکوژی وپاوانکردنی بازاڕ له‌ لایه‌ن لێپرسراوان و هه‌ڵگه‌ڕانه‌وه‌ له‌ بنه‌ما به‌رزه‌کانی سه‌رده‌می شۆڕش ؟ ، یان له‌ راوه‌دوونانی روناکبیرانی راجیاواز و ده‌مکوتکردنی ده‌نگه‌ موخالیفه‌کان ؟ ، ئایا به‌ پێی کام نمونه‌ی دێمۆکراسی له‌ دنیادا دوو سه‌ره‌کوه‌زیران و دوو وه‌زیر بۆ هه‌ر وه‌زاره‌تخانه‌یه‌ک شه‌رعیه‌تیان هه‌یه‌ و نمونه‌یین!؟ .

* * *
له‌ ماوه‌ی رابردوودا ، هه‌ڵبژاردنێکی پارله‌مانیمان کرد و ده‌ره‌نجامه‌کانیمان قه‌بووڵنه‌کرد ، هه‌ڵبژاردنی شاره‌وانییه‌کانمان کرد و وه‌ک به‌عسییان ره‌فتارمانکرد ، رۆژنامه‌مان ده‌رکردن و ئازادیی سنووردارمان تێدا به‌رجه‌سته‌ کرد ، سیسته‌می موئه‌سه‌ساتیمان دانا و ده‌ستمان له‌ ته‌زکیه‌ و خاترانه‌ی ئه‌م و ئه‌و هه‌ڵنه‌گرت ، قه‌راری عیراقیبوونماندا و پرسێکمان به‌ گه‌ل نه‌کرد ، ئایا ئه‌مه بوو نموونه‌ییی ئه‌زمونێکی دێمۆکراسی ؟!.
* * *
له‌ سه‌ره‌تای مانگی ئاینده‌وه‌ ده‌ستده‌که‌ین به‌ نووسینه‌وه‌ی یادگارییه‌کانمان سه‌باره‌ت به‌ زۆرتر له‌ چوارده‌ساڵ ئازادی و نه‌ژیان له‌ ژێر په‌رچه‌می داگیرکه‌رانی کوردستاندا ، به‌شبه‌حاڵی خۆم له‌و ماوه‌یه‌دا ، که‌ قۆناغی فامکردنه‌وه‌م وه‌ک مرۆڤێکی بێده‌وڵه‌ت بوو ، جگه‌له‌ کۆڵێک خه‌می گه‌وره‌ و خۆ به‌ بێکه‌سدیتن وه‌ک کوردێک ، شتێکی زیاترم نه‌بوو‌ بۆ گێڕانه‌وه‌ ، هاوڕێیه‌کم لێی ‌پرسیم : ناگه‌ڕێیته‌وه‌ بۆ کوردستان ؟ ، به‌ هێواشی پێم گووت : یادگارییه‌کی خۆشم نه‌بوو له‌وێ ، چۆن بگه‌ڕێمه‌وه‌ ؟!

* * *
ئێستاش که‌ له‌ هه‌ڵبژاردندا هاونیشتمانییه‌کانم ده‌گه‌ڕێنه‌وه‌ بۆ باوه‌شی ( عێراقی هیوا و ئاشتی ! ) ، چه‌نده‌ دڵم به‌ به‌ڵێنی تورکێک خۆشه‌ بۆ به‌ برایانه‌ ژیان ده‌گه‌ڵ کورددا ، هه‌رهێنده‌ش به‌ هاوژیانی له‌گه‌ڵ برا چاوڕه‌شه‌کانی به‌غدایێم دڵ خۆشده‌که‌م ، چاکیش ده‌زانم ئه‌و وڵاته‌ی به‌ته‌ماین له‌ نوێیی بنیادی بنێین، له‌ تڕه‌که‌ڵه‌کێک واوه‌تر نییه‌ ، به‌ڵام که‌ ده‌بینم خه‌ڵک ده‌یانه‌وێت تێیدا به‌شداربن ، هه‌ر هێنده‌م له‌ ده‌ستدێت پێیان بڵێم : پیرۆزتان بێت گه‌ڕانه‌وه‌ ،خوا بکات له‌و هاوژیانییه‌ په‌شیمان نه‌بنه‌وه‌ ! .
* * *

واباوه‌ڕده‌که‌م ئێمه‌ له‌ ماوه‌ی چوارده‌ساڵی رابردوودا ، پرۆڤه‌یه‌کی چاکمان کرد بۆ ناسینی بنه‌ماکانی دیمۆکراسی ، به‌ڵام نه‌مانتوانی ببینه‌ ئه‌زموونێکی نموونه‌یی ، گوتنی راستی و خۆناسین ، گوناه نییه‌ !!.

نووسه‌ر Hemn له‌ Wednesday, January 26, 2005 0 comments ( بۆچوونی تۆ ) (0)
Sunday, January 16, 2005
عێراقی کورد تێدا نه ماو !

سه‌باره‌ت به‌ ده‌نگدان و ده‌نگنه‌دان له‌ هه‌ڵبژاردنه‌ چاوه‌روانکراوه‌که‌ی عیراقدا ، کاتی خۆی له‌ رۆژنامه‌ی میدیادا نووسیم : هه‌رکه‌سێک ئازاده‌ له‌وه‌ی بچێت یان نا ، به‌ڵام ئه‌گه‌ر به‌ راستی خوازیاری ریفراندۆمین و ئه‌و راستییه‌شمان له‌به‌رچاو روون بۆته‌وه‌ که‌ ناکرێت کورد و عاره‌ب له‌ یه‌ک وڵاتدا وه‌کیه‌ک بژین ، ئه‌وه‌ رۆژی هه‌ڵبژاردن چاکترین کاتی راپرسی و جوابدانه‌وه‌یه‌ .


نازانم ئه‌و رایه‌م خوێندراوه‌ته‌وه‌ یان نا ؟ ، به‌ڵام به‌هه‌رحاڵ مه‌سه‌له‌ چاره‌نووسی میلله‌تێکه‌ و ده‌بێ به‌ هێندی وه‌ربگرین .

* * *

ده‌مه‌وێت نوکته‌یه‌کی دڵته‌زێنی دیکه‌تان سه‌باره‌ت به‌ عیراقی هیواوئاشتی !! بۆ بگێڕمه‌وه‌ :

له‌و رۆژانه‌دا به‌سه‌ر ماڵپه‌ڕی ( پرۆگرامی ده‌نگدان بۆ عیراق له‌ده‌ره‌وه‌ی وڵات‌ ) دا که‌وتم ، زوو چاوم به‌ ئاڵای نه‌خشێندراو به‌ سێ ئه‌ستێره‌و ئه‌ڵڵاهوئه‌کبه‌ره‌ یادگاریه‌که‌ی سه‌رۆکی فه‌رمانده‌ی له‌ زیندان په‌ستێندراو که‌وت ! ، به‌ خۆمم گووت : برا رۆ .. خۆ هاوار و گاڵه‌ی ره‌تکردنه‌وه‌ی ئاڵای به‌عسییانیان به‌ تورێکی ته‌ریش لێنه‌کرین !! ، ‌بزه‌یه‌کم کرد و دیسان گوتمه‌وه‌ : گوێی مه‌ده‌یه‌ ، هاوژیانی ده‌گه‌ڵ برا دا ئه‌و شتانه‌شی تێدا ده‌بن ! .

ئیدی به‌ رۆحێکی وه‌رزشییه‌وه‌ که‌وتمه‌ سه‌یرکردنی نێوه‌رۆکی ماڵپه‌ڕ ، دڵم خۆش بوو که‌ دیتم به‌ هه‌رسێ زمانی کوردی و عاره‌بی و ئینگلیزی زانیاری بڵاوکرابوونه‌وه‌ ، ( قسه‌ی راست دڵم به‌ دیتنی کوردییه‌که‌ خۆش بوو ، چونکه‌ ‌وه‌ک‌ پێنگاڤی ده‌ستپێک بۆ دانبه‌یه‌کدیدانان هاته‌ پێشچاوم !!) .

سێ و دووم نه‌کرد و چووم سه‌یری زانیاریی ده‌نگدان بکه‌م به‌ زمانه‌که‌ی خۆم ، به‌ڵام هه‌ر له‌ لاپه‌ره‌ی ده‌ستپێکه‌وه‌ تا کۆتایی نه‌مده‌زانی نه‌ قاقا لێبده‌م ، نه‌ بۆ به‌ختی ره‌شی ئه‌و کورده‌ هه‌ڵوه‌دایانه‌ بگریێم که‌ ده‌یانه‌وێت لێره‌ زانیاریی هه‌ڵبژاردنیان ده‌ستکه‌وێت ، ده‌پرسن : بۆ ؟ .. حه‌ز ده‌که‌ن بزانن لۆ ؟ ..
وه‌رن لاپه‌ره‌ی ده‌ستپێک پێکڤه‌ سه‌یرکه‌ین :

...................................................................................................................................

لاپه‌ره‌ی ده‌ستپێک :

به‌یاننامه‌کانی چاپه‌مه‌نی

14 وولات ئیمزای بیاننامه‌ی روژنامه‌وانییان کرد05-01-2005
هه‌ڵمه‌تی کوتایی زانیاری کردنه‌وه‌ی ده‌نگده‌ران05-01-2005
ره‌زامه‌ندی ووڵات به‌یاننامه‌ی روژنامه‌وانی
تومارکردنی شایسته‌یه‌تی روژنامه‌وانه‌ی 08-01-2005 کوتایی
به‌یاننامه‌ی روژنامه‌وانی متمانه‌پیکراو


زانیاری ده‌نگده‌ر

زانیاری گشتی
له‌ کوی ده‌نگ ئه‌دری
که‌ی ده‌نگ ئه‌دری
کی ئه‌توانیت ده‌نگ بدات
په‌یوه‌ندی

..............................................................................................................................

ئه‌وجا خوێنه‌رێت هێژا ، تکایه‌ وه‌ڵامی ئه‌و پرسیارانه‌م بده‌نه‌وه‌ :
* بۆ چی حه‌وتی سه‌ر ته‌واوی وشه‌کان ئه‌نفالکراوه‌ ؟
* ده‌بێ له‌ ( عێراق !!) دا کورد مابن ؟
* ئه‌و شێوازی زانیاری پێدانه‌ ، له‌ عیراقێکدا که‌ تا قۆناغی زانکۆش کورد به‌ زمانی خۆیان ده‌خوێنن ، بۆ به‌وهه‌موو هه‌ڵه‌ زمانه‌وانییانه‌وه‌ پێشکه‌ش ده‌کرێت؟ ده‌بێ مه‌به‌ستێکی ئه‌نقه‌ستی له‌ پشته‌وه‌ نه‌بێت ؟
· * تۆ بڵێی له‌ لیژنه‌ی هه‌ڵبژاردنه‌کاندا کوردی کوردیزان که‌منه‌بن ، بۆیه‌ ئه‌و هه‌ڵانه‌یان به‌سه‌ردا تێپه‌ڕیبێت ؟ .....
· * پرسیاری دیکه‌شم زۆرن و بۆ خۆت ده‌توانیت له‌ جیاتی من له‌ خۆتی بپرسی ................................!.

خوا له‌ ئاگری عیراق په‌نامان بدات .
* * *
ئه‌دره‌سی ماڵپه‌ڕی ( پرۆگرامی ده‌نگدان بۆ عیراق له‌ ده‌ره‌وه‌ی وڵات ) :
www.iraqocv.org

نووسه‌ر Hemn له‌ Sunday, January 16, 2005 0 comments ( بۆچوونی تۆ ) (0)
Thursday, January 13, 2005
نه ده بووایه بێده نگبین

ئه‌و کاته‌ی پۆستاڵڕه‌ش جووتشه‌قیان له‌ پیاوه‌ ردێن سپییه‌کانمان هه‌ڵده‌دا و به‌ بێئه‌ده‌بییه‌وه‌ زارۆکه‌کانیان ده‌کوشتین و کچه‌ نازداره‌کانیان ده‌کردینه‌ دیاریی شه‌وێکی سووری ناو سه‌ماخانه‌یه‌کی عاره‌بی ، ئێمه‌ ده‌مانزریکاند و دنیامان له‌ هه‌ڵه‌بجه‌کان و ئه‌نفاله‌کان و زینده‌به‌چاڵکردنه‌کان ئاگادار ده‌کرده‌وه‌ ، ئه‌و کاته‌ هێنده‌ ته‌نیا بووین که‌ دڵخۆشیی خۆمان به‌وه‌ ده‌دایه‌وه‌ که‌ بڵێین : ئه‌گه‌ر که‌سیش پشتماننه‌گرێت ، چیامان هه‌ن ، ئه‌وان دۆستی هه‌میشه‌ییمانن !!.

* * *

قه‌ده‌رمان وابوو که‌ نامراد بکوژرێین و خه‌ونی گه‌وره‌ له‌ دڵدا نه‌په‌روه‌رێنین ، که‌ تازه‌ جحێڵه‌کانمان خه‌تی سمێڵیان ده‌هات ، له‌ دواژوانی گه‌رمی یاردا ، به‌ له‌سه‌رخۆیی ده‌یانچرپاند : ئه‌وه‌ ده‌رۆم ، سۆزبێت تا رۆژی ئازادی زه‌ماوه‌ند نه‌گێڕم..
که‌چی له‌ جیاتی ئازادی ، له‌ نسکۆیه‌کدا ، ته‌رمی شین هه‌ڵگه‌ڕاوی تازه‌ جحێڵێکمان بۆ ده‌هاته‌وه‌ ! .
ئه‌و رۆژانه‌ هێنده‌ قه‌ڵس ده‌بووین له‌ دنیا ، که‌ باوه‌ڕمان دێنا به‌وه‌ی : مرۆڤایه‌تی ویژدانێکی خه‌وتووه‌ ، مه‌رگی هه‌زاران خورتی مه‌ ناتوانێت بێداری بکاته‌وه‌ !!.

* * *
خوا و ڕاستان ، دوای زه‌مه‌نێکی دوور ، دڵنه‌واییه‌کی سه‌نگینمان له‌ سه‌رکرده‌کانمانه‌وه‌ ‌بیست ، مژده‌ی ئه‌وه‌مان درایێ که‌ جارێکیدی نامرین ، جارێکیدی خه‌ونکوژ ناکرێین ، جارێکیدی کۆمه‌ڵکوژ ناکرێین . بۆ ؟ ، چونکه‌ دنیای ئێستا به‌رگه‌ی ئه‌وانشتانناگرێت ! ، ئێستا مرۆڤایه‌تی له‌سه‌ریه‌ک وه‌ده‌نگه‌ !!.
بۆیه‌ش ، ئێمه‌ی له‌ غه‌دردا شه‌ڵاڵ ، سوکه‌ هه‌ناسه‌یه‌کمان هه‌ڵکێشا و به‌ ئارامی به‌ زارۆکه‌کانمان گوت : خه‌ون ببینن چکۆله‌کان ، له‌به‌ر ئه‌وه‌ی مرۆڤایه‌تی له‌سه‌رتان وه‌ده‌نگدێت.

* * *
گوتم : زریکاندمان و مرۆڤایه‌تی نه‌یویست بمانبیستێت ، به‌ڵام ئێستا که‌ ناچاره‌ بیبیستێت و ناترسین ، ئێمه‌ چۆنین ؟ ، ئایا زریکه‌ی مرۆڤه‌کانی دی ده‌بیستین ؟ ، ئه‌رێ ئه‌گه‌ر بزانین له‌ سوچێکی دیکه‌ی ئه‌و دنیایه‌دا مرۆڤ کۆمه‌ڵکوژ ده‌کرێن ، وه‌ده‌نگ دێین یان خۆمان له‌ بیر ده‌که‌ین و بێده‌نگ ته‌ماشا ده‌که‌ین ؟ ، ده‌شمه‌وێت بپرسم : تۆ بڵێی نه‌گۆڕابین ؟ .

* * *
ئه‌وه‌ی له‌ رۆژانی رابردوودا له‌ وڵاتانی ده‌وروبه‌ری ئۆقیانوسی هیندیدا رویدا ، زۆرتر له‌وه‌ی کاره‌ساتێکی خه‌فه‌تبار بێت ، تاقیکردنه‌وه‌یه‌کی خه‌ته‌رناک بوو بۆ له‌ مه‌حه‌کدانی ( مرۆڤبوون ) له‌ دنیای نوێدا .
ده‌ریا له‌رزه‌یه‌ک ، به‌هێزێکی هێنده‌ی 900 بۆمبی ئه‌تۆمی له‌ هاوره‌گه‌زه‌کانمان ده‌دات و به‌ هه‌زارانیان لێده‌کوژێت ، جیاوازیش ناکات له‌ نێوان لاو و پیر و زارۆک و ژن ، که‌چی ئێمه‌ له‌وسه‌ری دنیادا بێده‌نگ تێیانه‌وه‌ راده‌مێنین و مێش میوانمان نییه‌ !! .
قسه‌یه‌کی ئه‌رنێست هه‌مه‌نگوایم وه‌بیر هاتۆته‌وه‌ که‌ ده‌ڵێت : له‌ روانگه‌ی سروشته‌وه‌ ، هیچ جیاوازییه‌ک نییه‌ له‌ نێوان مه‌رگی پشیله‌یه‌ک و مه‌رگی ئینسانێکدا (که‌واته‌ مه‌رگی مرۆڤێکیش ئه‌گه‌ر به‌ده‌ستی جه‌للادێک بکوژرێت، یان به‌ رووداوێکی سروشتی ، هه‌ر یه‌ک شته‌ - نوسه‌ر- )..
ئه‌و جوانی بۆچووه‌ ، به‌ڵام به‌داخه‌وه‌ هێنده‌ نه‌ژیا تا به‌ چاوی خۆی ببینێت ، ئێمه‌ نه‌ک بۆ مه‌رگی پشیله‌ به‌ڵکو بۆ مه‌رگی مرۆڤانیش ناره‌حه‌ت نابین .



* * *

له‌ تاقیکردنه‌وه‌که‌ی ( تسونامی ) دا ، وڵاتانی ئیسلامی نمره‌ی خه‌جاڵه‌تهێنه‌ریان هێنا ، له‌ رۆژانی رووداوه‌که‌دا نرخی نه‌وت له‌وپه‌ری به‌رزیدا بوو ، که‌چی پاره‌ی هه‌موو دنیای ئیسلامی نه‌گه‌یشته‌ ئه‌و پاره‌یه‌ی له‌ وڵاتێکی ئه‌وروپیی چکۆله‌ی وه‌ک هۆڵه‌ندادا بۆ کۆستکه‌وتووان کۆکرایه‌وه‌ ، به‌شبه‌حاڵی خۆم چاوه‌ڕێ بووم هاونیشتمانییه‌کانم کارێک بکه‌ن که‌ پێشانیبده‌ن برینه‌ هێشتا به‌سوێکانی خۆیان بیر نه‌چۆته‌وه‌ و به‌ راستیش شتێکی جیان له‌ ده‌وروبه‌ریان ..
* * *
بۆ من جێی سه‌رنج بوو که‌ پیاوانی ئایینیی کورد ، ئه‌وانه‌ی له‌ فتوادان و به‌ بێئه‌خلاقناساندنی هونه‌رمه‌ند و نڤیسه‌ڤاناندا چه‌له‌نگی که‌موێنه‌ن ، بۆچی بۆ مه‌رگی هه‌زاران موسوڵمانی ئه‌نده‌نوسیا فتوای پیتاککۆکردنه‌وه‌یان نه‌دا ؟ ، یان هاونیشتمانییه‌کانم ، ئه‌وانه‌ی له‌ ماره‌ییکردنه‌وه‌ی وڵاته‌که‌یان به‌ عێراقه‌وه‌ بێده‌نگ بوون ، بۆ له‌و تاقیکردنه‌وه‌یه‌شدا بێده‌نگیان هه‌ڵبژارد ؟ .. وه‌ڵام هه‌رچییه‌ک بێت ، ته‌نیا ده‌ڵێم ‌ : نه‌ده‌بووایه‌ بێده‌نگبین .‌

نووسه‌ر Hemn له‌ Thursday, January 13, 2005 0 comments ( بۆچوونی تۆ ) (0)
Sunday, January 09, 2005
مه‌رگی په‌پوله‌ ..


ئه‌و وێنه‌یه‌م له‌ وێبلاگی ( قسه‌کانی سه‌رکانی ) دیت ، هیچم پێناگوترێت ،ئه‌و سه‌رنجه‌ی ئه‌و نوسیویه‌تی جوانه‌ ، خۆتان حوکمبده‌ن ، ئایا ده‌کرێت له‌ دنیایه‌کی وا قێزه‌وندا به‌ ئارامی بخه‌وین ؟!.
....................................................................................................................................
خۆت گرمۆڵه كردووه*، پێش چاوت گرتووه. چییه؟ سه‌رماته؟ حه‌ز ناكه‌ی كه‌س ببینی؟ كه‌س بتبینێت؟ ده‌زانی گوڵی گیان، زۆریش فه‌رقی نییه. ئه‌گه‌ر ماباشی، دره‌نگ یا زوو، له ساردی و سڕی دونیای ئه‌مڕۆ. هه‌ر وا خۆت گرمۆڵه ده‌كرد و سه‌رمات هه‌ست پێ ده‌كرد. دره‌نگ یا زوو هه‌ڵتده‌بژارد پێش چاوی خۆت بگری كه‌س نه‌بینی. كه‌س نه‌تبینێت! گوێت بێنه شتێک بڵێم: خۆزگه‌م به خۆت، پێش ئه‌وه‌ی ئه‌و هه‌موو ناحه‌زی و تاڵی و زوڵم و یه‌ک نه‌بوونه ببینی، ڕۆیشتی! خۆزگه‌م به خۆت ده‌رفه‌تت نه‌بوو ببینی ئێمه كه ماوین، ئێمه كه هه‌ین چۆن ڕۆژ به ڕۆژ به‌ره‌وه پشته‌وه پاشه كشه‌ی ده‌كه‌ین! گوڵه ته‌نیاكه، له دایكیشت دڵگیر مه‌به‌! ئێمه‌ی مرۆڤ له‌وه باشتر نین. زۆر جاریش مافی هه‌ڵبژاردنمان نییه. زۆر جاریش ... (ببووره پێویست ناكات درۆت ده‌گه‌ڵ بكه‌م) زۆر جار نا، هه‌موو جارێش سه‌ر بۆ نه‌ویستنه‌كانمان داده‌خێین و بۆ ئه‌و به‌شه‌ی پێی ڕازی نین، مل كه‌چ ئه‌كه‌ین ... لێی دڵگیر مه‌به. مرۆڤ هه‌ندێ جار دڵ ڕقه، هه‌‌ندێ جار ناچاره. هه‌ندێ جار، زۆربه‌ی كات خۆ په‌ره‌سته ... ئارام به! ئێمه هه‌ین، نائارامییه‌كان به‌شی ئێمه! تۆ ئارام به! *له‌شی شین هه‌ڵگه‌راوی زارۆكێک له جۆگه‌له‌ی شاری تاران!

نووسه‌ر Hemn له‌ Sunday, January 09, 2005 0 comments ( بۆچوونی تۆ ) (0)
Saturday, January 08, 2005
لاوکێکی غه مگین بۆ زانکۆ کوردییه کان !

که‌ ده‌ڵێین ( زانکۆ ) ، چ نێوێکی سه‌نگینمان به‌سه‌رزاردا دێت؟! . ئه‌وه‌ی رۆژێک له‌ قوتابخانه‌ رۆنیشتبێ و قه‌شه‌نگیی کۆبوونه‌وه‌ی ئه‌و هه‌موو کوڕ و کچه‌ جحێڵانه‌ی دیتبێ که‌ بۆ فێر بوون لێکهاڵاون ، زه‌حمه‌ته‌ به‌ ناوی زانکۆ نه‌شڵه‌ژێت و هه‌ناسه‌یه‌کی قووڵ هه‌ڵنه‌کێشێ ...

ئاخر له‌م رۆژهه‌ڵاته‌ بێخاوه‌نه‌دا ، رۆژانێک ، دوایین شتێک که‌ لاوانی ئاینده‌ویست خه‌ونیان پێوه‌ده‌بینی زانکۆ بوو ، که‌ دایکێک رۆڵه‌که‌ی هاندابایه‌ ، پێیده‌گووت : جا ئیشاڵڵا هه‌ر دوو سێ ساڵی دیکه‌یه‌ ، بۆ خۆت ده‌چیه‌ زانکۆ و ده‌حه‌سێیه‌وه‌ ....!.

گه‌نجه‌کانیش، زه‌ینیان ته‌نیا بۆ ئه‌و کاته‌ ده‌چوو ، که‌ خوێندنیان ته‌واوکردووه‌ و له‌ زانکۆوه‌ وه‌ک مرۆیه‌کی به‌که‌ڵک ، به‌ هه‌گبه‌یه‌ک به‌رنامه‌وه‌ ، بۆ خزمه‌تی خه‌ڵک هاتوونه‌ته‌وه‌ ..

رۆژگارێک ، نموونه‌ی باڵا ، بۆ گه‌یشتن به‌ سبه‌ینێیه‌کی جوان ، زانکۆ بوو . ئه‌و کات ، که‌س بیری بۆ سه‌فه‌ری ناچاری نه‌ده‌چوو و به‌ جێهێشتنی نیشتمانیش هێنده‌ ئاسان نه‌بوو ، چونکه‌ لێره‌ ، مرۆڤ قه‌دری هه‌بوو !.

* * *

له‌ هه‌موو دنیادا، ئه‌وه‌ زانکۆییه‌کانن که‌ قسه‌ی نوێده‌که‌ن ، هه‌ر ئه‌وانیشن که‌ گۆڕان له‌ ئه‌ستۆ ده‌گرن و جڤاکێکی هۆشیار په‌روه‌رده‌ ده‌که‌ن .. له‌و دنیا گه‌وره‌یه‌شدا ، هه‌مووان ، بۆ داهێنان ، چاویان له‌ ده‌ستی وانه‌ ، زۆریشن ئه‌و فه‌یله‌سوف و بیرمه‌ندانه‌ی له‌ بڵندگۆی زانکۆکانه‌وه‌ ، گفتوگۆی وروژێنه‌ریان خستووه‌ته‌ جڤاکه‌وه‌ .

به‌ڵام له‌ وڵاتی ئێمه‌دا ، بێوه‌یترین ده‌زگا ، زانکۆیه‌ ! . لێره‌ ، زانکۆ نه‌ک هه‌ر کاریگه‌ریی به‌سه‌ر کۆمه‌ڵگاوه‌ نییه‌ ، به‌ڵکو زۆریش مه‌منونه‌ که‌ ئه‌و ره‌وشه‌ی ئێستای بۆ راوه‌ستێت ! ، له‌ کۆڕه‌کانی زانکۆدا باسی هه‌موو شتێکده‌کرێت ( ته‌نیا گۆڕان و داهێنان نه‌بێت !! ) ، له‌وێ هه‌موو شتێک ده‌یخوات ( ته‌نیا گه‌نگه‌شه‌ نه‌بێت !! ) ، به‌ کورتی : زانکۆ کوردییه‌کان له‌ هه‌موو شتێک ده‌چن ( ته‌نیا زانکۆ نه‌بێت !! ) .

* * *

بۆ چی زانکۆکانمان هێنده‌ داماون ؟ ، پرسیارێکه‌ و هه‌قه‌ بیپرسین ..
من تا له‌ حیکمه‌تی وه‌رگرتنی تایبه‌ت ( قه‌بوڵ خاس ) و وانه‌وتنه‌وه‌ به‌ پێودانگی خواره‌وه‌ی هه‌شتاکان و دزییه‌ زانستییه‌کان تێنه‌گه‌م ، ناتوانم وه‌ڵامی ئه‌و پرسیاره‌ گه‌وره‌یه‌ بده‌مه‌وه‌ ؛ به‌ڵام حه‌زده‌که‌م ئاکاده‌میسیه‌نه‌کان خۆیان جوابگۆ بن ! ...

* * *

زانکۆیه‌کی ئه‌مریکی نه‌خشه‌ی جیناتی دۆزییه‌وه‌ ، مامۆستایه‌کی زانکۆ باسی پێکدادانی شارستانیه‌تییه‌کانی کرد ، یه‌کێکی دیکه‌ش سه‌رقاڵی کۆپیکردنی مرۆڤه‌ ... ئه‌وانه‌ مانشێتی رۆژنامه‌کانی دنیان ، ئه‌و وڵاتانه‌ی مرۆڤی ئاساییی وه‌ک ئێمه‌یان تێداده‌ژین و سه‌رقاڵی بڵاوکردنه‌وه‌ی هه‌واڵی دوایین دۆزینه‌وه‌ زانکۆییه‌کانن . که‌چی رۆژنامه‌ کوردییه‌کان ، ناچارن شه‌ڕه‌زلله‌ی ئوستادانی زانکۆ و کۆبونه‌وه‌ی سانسۆرکردنی هه‌واڵه‌کانیان و گومانکردنی هه‌ندێکیان له‌ راستیی ئه‌و رووداوه‌ی که‌ کورد دایانتاشیوه‌ !! و ناویان ناوه‌ ( ئه‌نفال ) ، بڵاوبکه‌نه‌وه‌ !!! ...


ده‌مه‌وێ جارێکی دیکه‌ش بپرسمه‌وه‌ : زانکۆکانی ئێمه‌ ، بۆ وا داماون ؟

تێبینی : ئه‌م بابه‌ته‌ ، کاتی خۆی به‌رله‌وه‌ی کوردستان جێبهێڵم ، بۆ رۆژنامه‌ی میدیا نوسراوه‌ و رۆژی 15 / 9 /2002 بڵاو کراوه‌ته‌وه‌ .. له‌به‌ر ئه‌وه‌ی هێشتاش به‌داخه‌وه‌ هیچ شتێک له‌ نێوه‌رۆکی ئه‌و نوسراوه‌دا نه‌گۆراوه‌ ، بۆ ئارشیڤکردن لێره‌دا دامناوه‌ته‌وه‌ ..
نووسه‌ر Hemn له‌ Saturday, January 08, 2005 0 comments ( بۆچوونی تۆ ) (0)
Wednesday, January 05, 2005
هاونیشتمانییه کمان دادگایی ده کرێت، فریای که ون ..





ماوه‌ی چه‌ند رۆژێکه‌ خانمه‌ رۆژنامه‌نووسی کورد ( شه‌مزین جیهانی ) له‌ لایه‌ن ده‌زگای به‌دناوی ئیتیلاعاتی ئێرانه‌وه‌ تووشی زیندانیکردن بووه ، هه‌واڵه‌کان واڕاده‌گه‌یه‌نن که‌ نێوبراو به‌ تۆمه‌تگه‌لی جۆراوجۆر بڕیاری دادگایی کردنی ده‌رچووه‌ ، که‌ هه‌ره‌ سه‌ره‌کیترینیان بریتینه له‌ :

* نووسین له‌سه‌ر ره‌وشی ژنانی رۆژهه‌ڵاتی کوردستان .
* دیداری شێره‌ژنی کورد ( له‌یلا زانا) .
* نووسین ده‌رباره‌ی بڵاوبوونه‌وه‌ی مادده‌ی بێهۆشکه‌ر له‌ ڕۆژهه‌ڵاتی کوردستان .
* به‌کارهێنانی وشه‌ی ( رۆژهه‌ڵاتی کوردستان ) له‌ جیاتی کوردستانی ئێران!! .
* نووسین سه‌باره‌ت به‌ ژنه‌ سیاسه‌توانی زیندانیی کورد ( نوریه‌ که‌سبیر ) و زۆر شتی لابه‌لای تر ....

جا لێره‌وه‌ داوا له‌ خوێنه‌رانی هێژا و بلاگنووس و وێبماسته‌رانی ئازیزی کورد ده‌که‌م که‌ ده‌نگیان بخه‌نه‌ پاڵ ده‌نگی یه‌ک و له‌رێگه‌ی په‌یوه‌ندی کردن به‌ رێکخراوه‌ی ئه‌منستیی ئینته‌رنه‌شناڵ ، که‌ له‌خواره‌وه‌دا ئه‌دره‌سیان ده‌نووسم ، هه‌وڵ بده‌ن گوشاربخرێته‌ سه‌ر رژێمی داگیرکه‌ری ئێران بۆ گێڕانه وه ی ئازادیی ئه‌و هاونیشتمانییه‌ رۆژنامه‌نووسه‌مان .... چاوه‌روانی هاوکاریی ئێوه‌ی ئازیزم .

ئه‌دره‌سی ئه‌منستیی ئینته‌رنه‌شناڵ :
Scott Harrison : mailto:sharison@igc.org
Tel : 013034400913

Amnesty international : amnestyis@gn.apc.org
Tel : 0044714135500
Fax : 0044719561157

Human rights web : http://www.hrweb.org/
هه‌ڵبژارده‌ی به‌رهه‌مه‌کانی شه‌مزین :
شه‌مزین جیهانی :ژانی ژیانی ژنان..
شه‌مزین جیهانی و دکتۆر روئیا تلوعی : دیدارێک له‌گه‌ڵ له‌یلا زانا .. پی دی ئێف
نووسه‌ر Hemn له‌ Wednesday, January 05, 2005 0 comments ( بۆچوونی تۆ ) (0)
Saturday, January 01, 2005
قسه یه ک بۆ ساڵی نوێ ..


باپیرم هه‌میشه‌ ده‌یگوت : ( زۆری نه‌ماوه‌ ده‌جاڵ هه‌ڵستێ ..) ، لێمانده‌پرسی : ( ده‌جاڵ کێیه‌ باپیره‌ ؟ ) ، ده‌یگوت : ( که‌سێکه‌ سه‌ری له‌ هه‌وران ده‌دات ، به‌ خۆی و که‌رێکه‌وه‌ دێت و خه‌ڵک کافر ده‌کات ! ) ، ده‌مانپرسییه‌وه‌ :( جا كێی پێ کافرده‌کرێ ؟!) ، تۆزێک داده‌ما و ده‌یگوت : ( ئه‌وانه‌ی ده‌چنه‌ مه‌کته‌بێ و ده‌رسی شه‌یتان ده‌خوێنن ! ) ، ده‌په‌شۆکاین و به‌ترسه‌وه‌ ده‌مانپرسی : ( ئه‌دی کێی پێ کافر ناکرێت ؟! ) ، پێده‌که‌نی و ده‌یگوت : ( مه‌لا و فه‌قێ ، هه‌رکه‌سێک ده‌رسی خوا بخوێنێ !) ، زۆرتر ده‌په‌شۆکاین و ده‌مانپرسی : ( ئه‌دی که‌ی دێت ، باپیره‌ گیان .. ده‌جاڵ که‌ی دێت ؟ ) ، به‌ بێزارییه‌وه‌ ده‌یگوت : ( پیاوچاکێکی گه‌وره‌ گوتویه‌تی : ساڵی دووهه‌زار و شتێ!!) .

* * *

وه‌بیرمنایه‌ت باپیرم ئه‌و چیرۆکه‌ خورافییه‌ی له‌ کوێوه‌ هێنابوو ، به‌ڵام وه‌بیرمه‌ که‌ دوای ئه‌و گفتوگۆیه‌، ئێمه‌ی منداڵ ، ئێمه‌ی تۆقیو له‌ ئاوری جه‌هه‌نده‌م و گه‌شکه‌گرتوو له‌ ترسی جنۆکه‌ی چاوباشقاڵ ، که‌وتینه‌ پلاندانان ، من گوتم : به‌رله‌وه‌ی ده‌جاڵ بێت خۆم ده‌کوژم ، کاکیشم به‌ پێکه‌نینه‌وه‌ گوتی : ئه‌من فێڵی لێده‌که‌م ، به‌رله‌وه‌ی بێ، خۆم ده‌مزگه‌وتێداوێم و ده‌بمه‌ فه‌قێ ! .
که‌چی بوو به‌ ساڵی دووهه‌زار و ڕه‌نگه‌ شتێ ! ، نه‌ من خۆم کوشت ، نه‌ کاکیشم به‌ فێل چووه‌ ناو مزگه‌وتێ و بوو به‌ فه‌قێ ! .

* * *

هه‌موو سه‌ری ساڵێکی دوای دووهه‌زار ، چیرۆکه‌که‌ی باپیرم وه‌بیر دێته‌وه‌ ، بیر له‌ گوناهیی وی ده‌که‌مه‌وه‌ ، بیریش له‌خۆمانده‌که‌مه‌وه‌ ، باپیرم تا مردیش پێیوابوو دنیا له‌سه‌ر پشتی ماسییه‌که‌و ماسییه‌که‌ش له‌سه‌ر پشتی گایه‌که‌‌‌ ! ، تا مردیش ڕقی له‌ کاکۆڵداهێنانی جحێڵان ده‌بۆوه‌ و ده‌یگوت : پیاوی ئاشقه‌ ئاوێنه‌ پیاو نییه‌ ، تا مردیش هه‌ر ده‌یگوته‌وه‌ : زۆری نه‌ماوه‌ ده‌جاڵ هه‌ڵستێ ! ، ئێمه‌ش دیسان پلانمان داده‌نایه‌وه‌ ، که‌چی ده‌بوو به‌ ساڵی دووهه‌زار و ڕه‌نگه‌ شتێ ! ، نه‌ من خۆم ده‌کوشت ، نه‌ کاکیشم به‌ فێل ده‌چووه‌ ناو مزگه‌وتێ و ده‌بووه‌ فه‌قێ ! .

* * *

ئه‌وساڵ به‌ر له‌وه‌ی بیر له‌ هاتنی ده‌جاڵ بکه‌مه‌وه‌ ، ده‌فکری کورده‌ که‌رکوکییه‌ چادرنشینه‌کان ڕاده‌چم‌ ، ده‌فکری حیکمه‌تی هاتنی فۆڕمه‌ هه‌ڵه‌کانی ده‌نگدان و گرانیی سوته‌مه‌نی و پشتگوێخستنی خواستی به‌ ملیۆن ئیمزای ڕیفراندۆمویسته‌کانداده‌بم ، به‌ده‌م پێکه‌نینێکی ته‌وسئامێزه‌وه‌،‌ نامه‌یه‌کی کورت بۆ دۆستێکم ده‌نووسم و پێی ده‌ڵێم : تکایه‌ بۆم ڕوونبکه‌وه‌، له‌ وڵاتی بێ پاسپۆرت و بێ ئۆپۆزسیۆن ، دیمۆکراسیی چاره‌ی به‌قه‌ده‌رچی گرانه‌؟! ، لێشیده‌پرسم : به‌رله‌وه‌ی ده‌جاڵ هه‌ڵستێ ، پێمبڵێ ئه‌شقی یه‌کلایه‌نه‌ له‌ سیاسه‌تدا ده‌گاته‌ کوێ ؟ ، ئایا ده‌کرێ دڵی پێخۆشکرێ ؟! .

* * *

هێشتا نه‌بووه‌ به‌ ساڵی دووهه‌زار و شتێ ، به‌ر له‌وه‌ی ده‌جاڵ بێ ، بیر له‌ جحێڵه‌ هه‌ڵوه‌داکانی کورد ده‌که‌مه‌وه‌ ، ئه‌و جحێڵانه‌ی شه‌وێک له‌ شه‌وان ، له‌ ژێر کۆڵێک کارتۆندا ، له‌ گۆشه‌یه‌کی شاری پاریس تووشیان بووم و پێیانگوتم : تۆ بڵێی لێره‌ رزگارمان بێ ؟ . بیر له‌ عومه‌ر ده‌که‌مه‌وه‌ ، ئه‌و گه‌نجه‌ چوارده‌ ساڵه‌یه‌ی ، دوو ساڵ پێش ئێستا ، له‌ شه‌وی سه‌ری ساڵدا له‌ یۆنان دیتم ، قژلولێکی گریاوبوو ، پێی گوتم : ده‌مه‌وێ بڕۆمه‌وه‌ ، به‌ڵام نابێ ! ، ده‌بێ ئێستا دایکم منی بیر مابێ ؟ ..
هه‌ناسه‌یه‌کی قوڵ هه‌ڵده‌کێشم و سه‌یری هه‌واڵی جه‌ژنگێڕه‌کان ده‌که‌م :

له به‌ریتانیا ، خه‌رجیی ئه‌وساڵی جه‌ژن 30 ملیارد پاونده‌ ، ئه‌گه‌ر به‌ر له‌وه‌ی ده‌جاڵ بێ ، ئه‌و پاره‌یه‌ بۆ منداڵه‌ برسییه‌کانی دنیا خه‌رج بکرێ ، هه‌ریه‌که‌یان ژه‌مێک خواردنی چاکی به‌رده‌که‌وێ .
ئه‌گه‌ر پاره‌ی شه‌وی کریستمه‌سی هه‌ر هاوڵاتییه‌کی به‌ریتانی که‌ 813 پاونده‌ ، بۆ کڕینی پێڵاوی منداڵانی هه‌ژار خه‌رج بکرێ ، هه‌شتسه‌دو سێزده‌ جووت پێڵاوی ئاساییی پێدێ .
ئه‌گه‌ر ئه‌و 20 ملیۆن پاونده‌ی ئه‌مساڵ له‌ به‌ریتانیا به‌ بوکه‌شوشه‌ ده‌درێ ، وه‌ک دیاری بۆ وڵاتێکی بڕستلێبڕدراوی ئافریکا بنێردرێ ، هه‌رهاوڵاتییه‌ک خه‌رجیی ژیانی یه‌کساڵی ده‌ردێ ! ..

* * *

خه‌ریکه‌ ده‌بێت به‌ ساڵی دووهه‌زار و شتێ ، که‌چی نه‌ من خۆم کوشتووه‌ ، نه‌ کاکیشم به‌ فێڵ چووه‌ته‌ مزگه‌وتێ و بۆته‌ فه‌قێ !! .

نووسه‌ر Hemn له‌ Saturday, January 01, 2005 0 comments ( بۆچوونی تۆ ) (0)
About Me
ناو: Hemn
شوێنی ژیان
سه‌باره‌ت به‌ من
See my complete profile
Previous Post
Archives
Links